Венесуэлийн хамгийн том газрын тосны компанид хориг тавилаа
Шинэ оны эхэнд хоёр дахиа тангаргаа өргөсөн Венесуэл улсын Ерөнхийлөгч Николас Мадурогийн эсрэг сөрөг хүчнийхэн жагсаал тэмцэл зохион байгуулж эсэргүүцэл үзүүлж байгаа юм. Энэ долоо хоногт Америкийн Засгийн газар Венесуэл улсын төрийн мэдэлд байдаг газрын тосны хамгийн том компани “PDVSA”-ын эсрэг хориг баталлаа.
Латин Америкийн ядуу буурай улсын цэргийн эрх баригчид тайван замаар төрийн эрхийг шилжүүлэн авч эргэлт хийхийг Вашингтон уриалсан байна. Америкийн Үндэсний аюулгүй байдлын зөвлөх Жон Болтон Ерөнхийлөгч Мадурод хандан “ард түмний хөрөнгийг удаан мөлжиж чадахгүй” гэжээ.
Америк тэргүүтэй дэлхийн 20 гаруй улс сөрөг хүчний удирдагч Хуан Гуайдог сонгууль болтол түр хугацаанд үүрэг гүйцэтгэх Ерөнхийлөгчөөр хүлээн зөвшөөрч байна. Хэрэв Мадуро болон Засгийн газар түр Ерөнхийлөгчийг хүлээн зөвшөөрвөл “PDVSA” компанийн эсрэг тавьсан хоригийг цуцлах болно гэж Вашингтон мэдэгджээ.
Венесуэл бол Америкт түүхий нефт нийлүүлдэг дөрвөн том ханган нийлүүлэгчийн нэг юм. Америк бол Венесуэлийн газрын тосны хамгийн том худалдан авагч. Улс орны төсвийн 90 хувийг бүрдүүлдэг газрын тосны 41 хувийг Америкт нийлүүлдэг юм. Венесуэлийн газрын тосны компанид тавьсан хориг хэнд ашигтайгаар эргэх нь тун эргэлзээтэй гэж олон улсын ажиглагчид таамаглаж байна.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.