АНУ-ын Засгийн газар “Huawei”-н эсрэг хэрэг үүсгэлээ

АНУ-ын Шүүх байгууллагаас Хятадын технологийн тэргүүлэгч “Huawei” компани болон тус компанийн санхүүгийн дэд захирал Мэн Ванжоугийн эсрэг 23 төрлийн хэрэг үүсгэж байгаагаа мэдэгдлээ.

Хатагтай Мэн Ванжоу өнгөрсөн оны 12 дугаар сарын нэгний өдөр Канад улсад баривчлагдаж, 10 сая канад долларын батланд даалтанд суллагдаад байгаа ч 24 цагийн хараа хяналтад байгаа юм. Түүний хэргийг Вашингтонд шилжүүлэхээр Америкийн эрх баригчид ажиллаж байна. Мэн Ванжоуг баригдсаны дараа Канад улсын гурван ч иргэнийг Бээжингийн эрх баригчид саатуулсан.

Шүүх яамны тулгаж буй хоёр гол хэрэг бол “Huawei Device USA” болон “Skycom Tech” компаниуд харилцаа холбоогоо нууцалж Америк төдийгүй олон улсын банкуудыг залилсан гэж үзжээ. “Skycom Tech” нь Иран улсын эсрэг тавьсан байсан эдийн засгийн хориг арга хэмжээг зөрчсөн гэж буруутгагдаад байгаа юм. Америкийн Засгийн газар 2015 онд цөмийн хөтөлбөрийн гэрээ хэлэлцээрийн дараа Ираны эсрэг хоригоо цуцалсан ч зарим хоригийг албадан хэрэгжүүлэхээр болсон.

Хоёрдугаарт “Huawei” компани нь Америкийн “T Mobile” компаниас  ухаалаг гар утасны чанар болон хуруу уншуулах систем зэрэг технологийг хулгайлсан гэж үзсэн. “Samsung” брэндийн дараа орох шилдэг технологийн компани болохын тулд “Huawei” “Apple”-ыг алхсах хэрэгтэй болж байгаа юм.

“Huawei” болон дэд захирал Мэн Ванжоуг гэм буруутай гэж үзэж байгаагаа Америкийн тал олон нийтэд зарласан ч компанийн зүгээс аль ч хэрэгт холбогдолгүй, хүлээн зөвшөөрөхгүй байгаагаа илэрхийлсээр ирсэн. Хятадын Засгийн газар тус компанийн шинээр нэвтрүүлж буй 5G технологийг ашиглан цахим тагнуул хийж магадгүй гэж үзэн дэлхийн улс орнууд эргэлзэж эхэлсэн.

Америк, Канад, Хятад гурван улсын харилцааг эрсдэлд оруулсан “Huawei” технологийн компанитай холбоотой хэрэг Америк-Хятадын худалдааны дайнд ихээхэн дарамт болж байна. Даваа гарагт буюу өчигдөр Хятадын албаны хүмүүс худалдааны зөрчлийг шийдэхээр Вашингтоныг зорино гэдгээ мэдэгдсэн. Америкийн Худалдааны яамны нарийн бичгийн дарга Вилбур Росс “Huawei” компанийн хэрэг Хятад-Америкийн худалдааны гэрээ хэлэлцээрээс ангид асуудал гэж тайлбарлаад байгаа юм.

Эх сурвалж: www.bbc.com, www.cnn.com