Ууранд суух нь бие дэх хорыг гадагшлуулдаг

Долоо хоногт нэг удаа ууранд сууж байгаарай

Ууранд суух нь биеийг тайвшруулдаг гормоныг нэмэгдүүлэхээс гадна бие организмд хуримтлагдсан хэрэггүй хорт бодисыг гадагшлуулахад чухал үүрэг гүйцэтгэдэг. Хүн эрүүл амьдрахад тогтвортой хооллолт болоод биеийн тамирын дасгалыг дүрэм болгон дагах хэрэгтэй юм. Хүний биед “токсин” буюу хэрэггүй бодис байнга хуримтлагдаж байдаг. Хоол хүнсээр дамжин биед хуримтлагддаг хэрэггүй бодисууд цаг хугацааны аясаар олширч, өвчин үүсгэдэг байна. Тиймээс үүнийг ямар нэгэн байдлаар биеэсээ зайлуулах ёстой юм. Биеийн тамираар хичээллэх нь хэрэггүй хорыг биеэс хөлс болгон гадагшлуулдаг.

Харин хүний бие организм хорт бодисыг  элэг болон бөөрний үйл ажиллагааны тусламжтайгаар гадагшлуулдаг. Элэг хэрэгггүй бодисыг байнга гадагшлуулсаар байгаад ядардаг. Ачаалал ихтэй тохиолдолд хорт бодисын нэгээхэн хэсгийг л гадагшлуулах чадвартай юм. Бид биеийнхээ дотоод эрхтэний суларч, чадвараа алдаж буйг анзаарахгүй өнгөрөөдөг. Харин биеэс хорыг зайлуулах хялбар арга бол ууранд суух. Уур нь бие дэх хорыг хөлсний хамт эрхтэнүүдийг ядраалгүйгээр гадагшлуулдаг. Ингэснээр эрүүл мэндэд ч сайн нөлөөтэй. Уур нь цусны эргэлтийг тайвшруулж, биед булгарч хатуурсан булчин үүсгэхээс сэргийлнэ. Долоо хоногт нэг удаа ууранд суусны дараа үр дүн нь шууд мэдрэгддэг байна.

Ууранд суухад бие хөнгөрч, сэтгэл сэргэдэг 

Халуун усанд орсны дараа бие хөнгөрч, сэтгэл сэргэдэг. Сэтгэлийн ийм өөдрөг байдал бие махбодийг өвчин эмгэгээс хамгаалж тэнхэл өгдөг нь хэдийнэ нотлогдсон. Халуун усанд ороход халуун уур, усны илч арьсны нүх сүвийг онгойлгож, хир буртгийг цэвэрлэдэг. Мөн арьсны дээд давхаргын үхэжсэн эд дэвтэж унана. Эрүүл ахуйчид  сауны өрөөний вандангуудыг олон хүн орсны дараа шинжлэхэд өвчин үүсгэгч нян илрээгүй байна. Учир нь халуун ууранд тухайн орчны болон биеийн арьсан дээрх нян устдаг аж. Арьсны уян хатан байдлыг сайжруулахын тулд тамирчин булчингаа  байнга сайжруулдаг шиг арьсаа тордож, дасгалжуулах хэрэгтэй.

Ууранд суух нь арьсыг  дээд зэргээр дасгалжуулж, хөлсний булчирхайн үйл ажиллагааг сайжруулдаг. Халуун уурны илч эд эсийг хүчтэй цочроохоос гадна физиологийн олон урвалыг үүсгэдэг. Үүний нөлөөгөөр цусны эргэлт идэвхжиж, бие махбодийн үйл ажиллагаа сэргэнэ. Арьс дулаацаж, хөлс их ялгарна. Хөлсөөр дамжин зөвхөн илүүдэл дулаан төдийгүй бодисын солилцооны эцсийн илүүдэл бүтээгдэхүүн гадагшилдаг. Халуун усанд орсны дараа бие хөнгөрдөг нь зөвхөн арьсны нүх сүв онгойж цэвэрлэгдсэнийх бус цусны эргэлт сайжирсантай холбоотой. Халуун ус, уур нь биеийн жинг нэмдэггүй. Харин өвчний хурц үе, архаг өвчин хурцадсан халуунтай үед ууранд сууж хэзээ ч болохгүй.Ууранд суухын өмнө их идэж ч болохгүй. Учир нь зүрхэнд хэт их ачаалал өгдөг. Тиймээс хөнгөн маягаар хооллох хэрэгтэй. Ууранд суусны дараа биеэ аажмаар хүйтэн усаар шүршиж, чийрэгжүүлвэл ханиад, томуу тусахгүйгээс гадна арьс чангарч толигор болдог байна.