Швейцарийн Давос хотод Дэлхийн эдийн засгийн чуулган үргэлжилж байна. Энэ жилийн чуулганы нээлтийн дараа оройн хоолон дээр дэлхийн тэрбумтнуудын нэг Жорж Сорос Хятадын дарга Си Зиньпинийг нээлттэй нийгмийн хамгийн аюултай заналт дайсан хэмээн буруутгажээ.

“Си Зиньпин хиймэл оюун ухаан, машин технологийн тусламжтайгаар ард иргэдээ хянан цагдаж байна” гэж Жорж Сорос шүүмжилсэн юм. Хятадын Засгийн газар сошиал кредит системээр иргэдийнхээ оршин буй байдал, зан ааш, холбоо харилцааг бүрэн хянаж эхэлсэн. Хэрэв оноогоо хасуулбал хаашаа ч явж чадахгүй байдалд хүрч галт тэрэгний тасалбар худалдаж авах боломжгүй болно.

Өөрөөр хэлбэл технологийн дэвшил, хиймэл оюун ухааныг ашиглан захиргаадалтын дэглэмийг хэрэгжүүлж байна гэж шүүмжилсэн юм. Энэ жил 88 настай тэрбумтан, хөрөнгө оруулагч Сорос Хятадын энэ асуудалд хатуу байр суурь илэрхийлэхийг Трампын Засгийн газарт хандан уриалсан байна.

Сорос өнгөрсөн жилийн Давосын чуулган дээр Америкийн Ерөнхийлөгч Дональд Трампыг Facebook, Google зэрэг цахим сүлжээг буруу аргаар ашиглаж байгаад буруутгаж байжээ.

Хятадын дарга хамгийн сүүлд 2017 онд Давосын эдийн засгийн чуулганд өөрийн биеэр ирж оролцож байсан. Харин өнгөрсөн жил эдийн засгийн зөвлөх Лю Хэг илгээжээ. Энэ жил ч мөн Си дарга өөрийн биеэр ирээгүй байна.

 

Эх сурвалж: www.qz.com

---