Утсаа цэнэглэхэд “утас” хэрэггүй
Гар утас ашигладаг хүн бүр цэнэглэгчээ цүнхэлж, халаасалж явдаг гэхэд хилсдэхгүй. Хаана цэнэглэгч байна тэнд цэнэглээд авахад гэмгүй байдаг шүү дээ. Тэгвэл тун удахгүй энэ байдал үгүй болно гэдгийг технологийн шинжээчид хэлж байна.
Энэ онд трэнд болох эвхэгддэг гар утасны технологитой танилцаж амжаагүй байхад дараагийн шинэ технологи нэвтэрч эхлээд байгаа юм. Бидний уран зөгнөлт кинон дээрээс л харж байсан шилэн гар утас хэрэглээнд нэвтрэхэд удаан хүлээх шаардлагагүй бололтой.
Учир нь Хятадын хэд хэдэн гар утас үйлдвэрлэгч компани кабел утсаар цахилгаанд холбон цэнэглэх шаардлагагүй гар утсуудыг танилцуулжээ. Өөрөөр хэлбэл гар утсанд цэнэглэгч, чихэвч залгах, сим карт хийх нүхгүй болох юм. Гар утасны зах зээлд тэргүүлэгчдийн нэг Apple энэ талаар судалгаа хийсээр ирсэн ч өмнөд хөршийн мэргэжилтнүүд урд нь гишгэжээ.
Хятадын VIVO компанийн үйлдвэрлэсэн “Apex 2019” гар утсанд нээлттэй нүх огт гаргаагүй байна. Урд талын камер байхгүй, нүүр нь тэр чигтээ дэлгэц. Хурууны хээгээр таньж нээгддэг ба “MagPort” буюу цахилгаан соронзын нөлөөгөөр цэнэгээ хуримтлуулдаг.
Дараагийн танилцуулах технологийн шилдэг шийдэл бол Хятадын MEIZU компанийн гаргасан “ZERO” гар утас юм. Энэ утсанд товчлуур, спикерийн нүх, сим картны таг аль нь ч байхгүй. Оронд нь дэлгэцээрээ дуугаа дамжуулдаг, утасгүй цэнэглэгч, и-Сим картыг суулгажээ. “Apex 2019”-өөс ялгаатай нь дэлгэцийн урд талд камертай.
Тиймээс та бид урт цэнэглэгчтэй зууралдаж явахаа болиход 100 жил хүлээх шаардлагагүй. Тун удахгүй гар утсаа цэнэглэхийн тулд кабел утас ашиглах шаардлагагүй болох нь ээ.
Эх сурвалж: www.qz.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.