“Таалагдахгүй байна” гэсэн үндэслэлд гишүүд дургүйцэж эхэлжээ

Ерөнхийлөгчийн өргөн барьсан хуулийг өнгөрөгч долоо хоногт УИХ баталснаар УИХ-ын даргыг гишүүдийн олонхын саналаар огцруулж болдог боллоо. Энэ хууль Үндсэн хууль зөрчсөн үү, үгүй юу гэдэг нь тусдаа асуудал. 1992 оноос хойш УИХ-д сууж байгаа ахмад гишүүн Д.Лүндээжанцан “Хэрэв энэ асуудал Үндсэн хуулийн цэцэд очвол би лав очихгүй шүү” гэдгээ шулуухан хэлнэ лээ. Тэгэхээр ямархуу “хэврэг” хууль баталснаа Д.Лүндээжанцан гишүүн олон таван үггүй хэлчихлээ. Ямартаа ч энэ хуулийг батлуулснаар Ерөнхийлөгч, Ерөнхий сайдын улстөрийн хослол зорилгодоо хүрэхийн тулад нэг алхам урагшилж байгаа хэрэг юм.

Одоо УИХ-ын даргыг огцруулахаар гарын үсэг зурсан 40 гишүүний бичгийг Л.Оюун-Эрдэнэ нар албан ёсоор өргөн барьснаар дараагийн алхмаа хийх ёстой. Өргөн баригдсаны дараа УИХ хэлэлцэж шийдвэрлэснээр УИХ-ын дарга М.Энхболд албан тушаалаасаа буун, олон сар үргэлжилсэн улстөрийн гацаа арилах учиртай юм.

Гэтэл өчигдрөөс Л.Оюун-Эрдэнэ нарт нэгэн асуудал тулгарч эхэлсэн нь огцруулахаар гарын үсэг зурсан гишүүдийн тоо тоондоо хүрэхгүй байгаа аж. Өмнө нь 40 гишүүн огцруулахаар гарын үсэг зурж санал нэгдсэн ч албан бичиг болгон албажуулах гэтэл зарим нь “Үндэслэл муутай байгаа учир харзная” гэсэн байдлаар хойш суугаад байгаа гэнэ.

УИХ дахь АН-ын бүлэг өчигдөр мөн “Гарын үсэг зурахгүй” гэдгээ мэдэгдчихлээ. Тэгэхээр Я.Санжмятав, З.Нарантуяа нар лав дахин гарын үсэг зурахгүй болж таарлаа. Өөр хэн, хэн гарын үсэг зурахаас цааргалаад байгаа талаар Л.Оюун-Эрдэнэ нар удахгүй мэдээлэх биз.  

УИХ-ын 39 гишүүн санал нэгдэж бичиг өргөн баригдсанаар УИХ-ын дарга суудлаасаа огцрох ёстой. Дургүйцлээ илэрхийлж байгаа гишүүдийн хувьд “Огцруулах үндэслэлээ тодорхой болго. Үндэслэл муу байна” гэж хэлж байгаа нь юу гэсэн үг вэ? Бүр зарим нь “Таалагдахгүй байгаа учир огцор гэсэн утгатай тэмцэл явагдаад байна. Тодорхой болго” гэж Л.Оюун-Эрдэнэ нарт зөвлөөд байгаа гэнэ.

МАНАН-г арилгана гээд МАН болон АН-ын гишүүд жагсаж байснаа сүүлдээ гэр тараах сугалаа болж хувирсныг ч зарим гишүүн шүүмжилж байгаа аж.

39 гишүүний гарын үсэг хэзээ бүрдэж Ерөнхийлөгч, Ерөнхий сайдын хослолын зорилго биеллээ олох бол?