2030 онд Энэтхэг эдийн засгаараа Америкийг хол давна

Дэлхийн эдийн засаг цоо шинэ чиг хандлага руу эргэж байгааг салбарын шинжээчид ярьж байна. Тэр дундаа Энэтхэг дараагийн том зах зээл болж байна.

Ирэх 2030 онд буюу одоогоос 10 гаруй жилийн дараа Энэтхэг улс эдийн засгийн өсөлт, үзүүлэлтээрээ Америкийг давна гэж Их Британид төвтэй үндэстэн дамнасан “Standart Chartered” банкнаас тооцоолжээ.

Харин Хятад 2020 он гэхэд эдийн засгийн үзүүлэлтээрээ Америкийг ардаа орхиж 2030 он гэхэд дэлхийд тэргүүлнэ гэж тус банк таамагласан байна. 10 гаруй жилийн дараа дэлхий дээр эдийн засгаараа тэргүүлэх 10 улсыг дотоодын нийт бүтээгдэхүүний дүнгээр жагсаажээ.

1.    Хятад /64,2 их наяд ам.доллар/

2.    Энэтхэг /46,3 их наяд ам.доллар/

3.    АНУ /31 их наяд ам.доллар/

4.    Индонези /10,1 их наяд ам.доллар/

5.    Турк /9,1 их наяд ам.доллар/

6.    Бразили /8,6 их наяд ам.доллар/

7.    Египет /8,2 их наяд ам.доллар/

8.    Орос /7,9 их наяд ам.доллар/

9.    Япон /7,2 их наяд ам.доллар/

10. Герман /6,9 их наяд ам.доллар/

“Standart Chartered” банк 2013 оны төсөлдөө Энэтхэг улсыг 2020 он гэхэд эдийн засаг нь 7,8 хувиар өснө гэж тооцоолж байжээ. Тус улс хүн амаараа дэлхийд хоёрдугаарт ордог ба тал нь 25-аас доош насныхан юм.

Тиймээс залуу үед зориулсан ажлын байр бэлтгэх шаардлага нэн түрүүнд гарч ирж байна. 2030 он гэхэд 100 сая ажлын байр шаардлагатай гэж эдийн засагчид тооцжээ. Өөрөөр хэлбэл жилд 10 сая боловсон хүчин бэлтгэх шаардлагатай ч одоогийн чадамж нь жилд 4,5 сая байгаа юм. Цаашид эдийн засгийн өсөлтөө хадгалахын тулд дэд бүтцийн шинэчлэл, хүн амын эдийн засгийн тогтвортой байдлыг хөгжүүлэх шаардлагатай гэжээ.

Эх сурвалж: www.qz.com