Карлос Госн буруугүй гэв

“Ниссан” автомашин үйлдвэрлэгч компанийн гүйцэтгэх захирал байсан Карлос Госн өнөөдөр Токио хотын шүүхэд мэдүүлэг өглөө.

Госн “Ниссан компанид ажиллаж байх хугацаандаа буруу зүйл огт хийгээгүй бөгөөд удаан хугацаагаар барьж саатуулж байгаа нь үндэслэлгүй шударга бус баривчилгаа. Би Ниссан компаниас ямар ч нөхөн төлбөр аваагүй, ямар нэг гэрээ хэлэлцээрээс ашиг хонжоо хайгаагүй” хэмээн мэдэгджээ.

Эх сурвалжийн мэдээлснээр Госн шүүхэд ирэхдээ хар өнгийн хувцастай, бага зэрэг турсан харагдаж байжээ. Токиогийн шүүгч Ючи Тада хариуд нь “Госныг зугтаах болон хэргээ нуун далдлахаас сэргийлж баривчлан саатуулж байгаа” гэсэн тайлбар өгсөн байна.

64 настай Карлос Госн өнгөрсөн оны 11 дүгээр сарын 19-ний өдрөөс хойш саатуулагдаж байна. Түүнийг удаа дараа санхүүгийн алдагдалтай үйл ажиллагаа явуулсанд буруутгажээ. Госны баривчилгааны хугацаа энэ сарын 11-ний өдөр албан ёсоор дуусна.

Эх сурвалж: www.reuters.com