Хоккей ДАШТ: Чехийн шигшээ баг америкийг барсангүй

Канад улсын Ванкувер болон Викториа хотноо шайбтай хоккейн өсвөр үеийн дэлхийн аварга шалгаруулах 43 дах удаагийн тэмцээн он дамнан явагдаж байна. ДАШТ-д оролцож буй 10 улсын баг 2 хэсэгт хуваагдан хүч үзсэн ба шөвгийн 4 баг тунан улдээд байна.

Хоккейн спортоор дэлхийн хүчтэй багуудын нэг болох Чехийн шигшээ баг шөвгийн 8-ийн тоглолтонд АНУ-ын шигшээ багтай учраа таарч 3:1 харьцаагаар хожигдон тэмцээнээ өндөрлүүллээ. 

Тоглолтын турш Америкийн баг Чехийн хаалганд 41 удаа цохилтыг гүйцэтгэсэн бол Чехийн баг Америкийн хаалганд 19 удаа цохисон байна. Хамгийн сүүлд 1997 онд Финландад болсон ДАШТ-ий шөвгийн 8-д Чехийн баг Америкийн багийг хожиж байсан түүхтэй. Ерөөс энэ хоёр баг түүхэндээ 6 удаа ДАШТ-ий шөвгийн 8-д учраа таарч Америкийн шигшээ баг таван удаад нь хожоод байгаа юм. Өмнөх ДАШТ-ий хүрэл медалийн төлөө мөн хоорондоо учраа таарахад Америкийн баг Чехийг 9:3 харьцаагаар хожиж хүрэл медаль хүртэж байсан билээ. 

Америк болон Чехийн шигшээ багуудын шөвгийн 8-ийн тоглолтын тойм

Ийнхүү Америкийн баг цааш хагас шигшээд шалгарч тав дахь удаагаа дэлхийн аварга болж чадахыг эсэхийг харах л үлдлээ. Тэд 2004, 2010, 2013, 2017 оны дэлхийн аварга баг юм. Тэднийг хагас шигшээд ОХУ-ын хүчирхэг баг хүлээж байна. Тэд мөн л дэлхийн 4 удаагийн аварга буюу 1999, 2002, 2003, 2011 оны аварга баг билээ.