Энэтхэг улсын Керала мужид эмэгтэйчүүд эрхийнхээ төлөө нэгдэж жагсчээ. Тэдний жагсаалын хэлбэр энгийн нэг цуглаан биш байснаараа онцлог болов. Керала мужийн өнцөг булан бүрээс ирж эрхээ хамгаалахын төлөө нэгдсэн эмэгтэйчүүд 620 км үргэлжилсэн хүн цуваа буюу гинжин холбоос үүсгэжээ.

 

 

Улаанбаатар хотоос Баянхонгор аймгийн төв хүртэл, эсвэл Архангай аймгийн Чулуутын хавцал хүртэл зайнд үргэлжилсэн урт гинжин холбоост таван сая эмэгтэй эрхээ хамгаалан нэгдсэн байна.

 

 

Хинду шашны томоохон сүм хийдүүдийн нэг Сабарималад 10-50 насны буюу бодисын солилцоо идэвхтэй явагдаж, сарын тэмдэг нь ирдэг эмэгтэйчүүд орохыг хориглосон байдаг. Дээд шатны шүүхээс уг дүрэм журмыг халах шийдвэрийг өнгөрсөн оны есдүгээр сард гаргасан ч мөрдөгдөөгүй ажээ.

Залуу эмэгтэйчүүдийг сүмд орох гэхэд хүмүүс хүчээр чирж гаргах, чулуу нүүлгэж доромжлох зэргээр эсэргүүцэл үзүүлсээр байна. Учир нь дээд шүүхийн шийдвэрийг сүсэгтэн олон сүмийн дүрэм журмаас гадна олон зуун жилийн түүхтэй сүсэг бишрэлийг үгүй хийсэнтэй адил хэмээн үзжээ.

Энэ явдлыг эсэргүүцэж эмэгтэйчүүд нийгмийн тэгш эрхийг сахин хамгаалахыг шаардаж байна. Хүн цувааг Энэтхэгийн зүүнтний эвслийн эрх баригчид зохион байгуулсан ба дан эмэгтэйчүүд жагссан гинжин холбоос Керала мужийн Касарагод хотын хойд цэгээс Тирувантапурам хотын урд цэг хүртэл үргэлжилсэн байна.

 

 

Эрхийнхээ төлөө тэмцэж буй эмэгтэйчүүд “энэ бол эмэгтэйчүүдийн хүч чадал, хэн бэ гэдгийг харуулах маш чухал хөдлөгөөн. Бид л бие биедээ тусалж чадна. Сабаримала сүмд бүх насны эмэгтэйчүүдийг оруулдаг байгаасай гэж хүсч байна. Бид бусдын адил мөргөл үйлдэж, залбирах эрхтэй” хэмээн ярьжээ.

 

 

Хэдийгээр хууль батлагдсан ч залуу бүсгүйчүүд сүм рүү очихоос зүрхшээсээр байгаа юм. Өнгөрсөн 10 дугаар сард хоёр эмэгтэй сүм рүү орохоор явахад таван км орчим үргэлжилсэн эсэргүүцэгчидтэй нүүр тулж бүсгүйчүүд руу чулуу шиджээ. Хоёр бүсгүйг хамгаалахаар 100 гаруй цагдаа ажилласан байна.

Хинду шашны томоохон сүмд идэр залуу бүсгүйчүүдийг оруулахыг зөвшөөрсөн нь иргэдийг талцуулаад зогсохгүй улс төрчид ч мөн эсрэг тэсрэг байр сууриа илэрхийлжээ.

 

Эх сурвалж: www.bbc.com

---