Оюутолгойн уурхайг эрчим хүчээр хангах нь баталгаажив

Хөрөнгө оруулалтын гэрээнд заасны дагуу “Оюу Толгой” ХХК дөрвөн жилийн дотор эрчим хүчний хэрэглээгээ дотоодын эх үүсвэрээс 100 хувь хангах ёстой хэмээн заасан байдаг ч талууд тохиролцож чадахгүй байснаар оны төгсгөлд Засгийн газар нааштай хариу гаргалаа.

Энэ хүрээнд 300 МВт хүчин чадалтай Тавантолгойн дулааны цахилгаан станц барьж, Оюутолгой төслийн төв дэд станцтай 220 кВ-ын хоёр хэлхээтэй цахилгааны шугамаар холбоно

Өнгөрсөн долоо хоногийн Засгийн газрын шийдвэрээр Тавантолгойн ордыг түшиглэн Оюутолгойн төслийг эрчим хүчээр хангах цахилгаан станц барих тухай гэрээнд гарын үсэг зурах эрхийг сайд Ц.Даваасүрэн, Эрчим хүчний зохицуулах хорооны дарга А.Тлейхан нарт олгосон. Тэгвэл өнөөдөр Монгол Улсын Засгийн газар, “Оюутолгой” ХХК хооронд байгуулсан гэрээний дагуу Тавантолгойн нүүрсний орд газрыг түшиглэн 300 МВт хүчин чадалтай “Тавантолгойн ДЦС”-ыг барих гэрээнд гарын үсэг зурахаар болжээ.

Энэ хүрээнд 300 МВт хүчин чадалтай Тавантолгойн дулааны цахилгаан станц барьж, Оюутолгой төслийн төв дэд станцтай 220 кВ-ын хоёр хэлхээтэй цахилгааны шугамаар холбоно. Цаашид хүчин чадлыг нь өргөтгөх боломжтой байх юм байна. Барилгын ажлыг 2020 оны гуравдугаар сард эхэлж, 2023 оны зургаадугаар сарын эцэс гэхэд дуусгах гэнэ. Санхүүжилтийг “Тавантолгойн цахилгаан станц” компанийн Хөрөнгө оруулалтын гэрээгээр зохицуулахаар гэрээнд тусгажээ.

 “Оюутолгой” компани жилд 300 гаруй тэрбум төгрөгийг ӨМӨЗО-ноос эрчим хүч худалдан авахад зарцуулж байгаа ажээ. Гүний уурхайн үйл ажиллагаа жигдрэх үед цаашид “Оюу Толгой” ХХК эрчим хүчний хэрэглээнд жилд 250 хүртэлх сая ам.доллар зарцуулна гэсэн тооцоо байна.

Иймд “Тавантолгой ДЦС” ашиглалтад орсноор дээрх мөнгөн урсгал гадагшаа биш дотооддоо үлдэх боломжтой. Түүнчлэн манай улсын нийт эрчим хүчний хэрэглээний 4/1 “Тавантолгой ДЦС” бүрдүүлэх боломж бүрдэж байгаа юм.