Умард Солонгосын Засгийн газар Америк гэр бүлд хагас тэрбум ам.долларын өртэй болов
Вашингтон дахь Холбооны шүүхийн шийдвэрээр Умард Солонгос улсын Засгийн газар Америк гэр бүлд хагас тэрбум буюу 500 сая ам.долларын нөхөн төлбөр олгох ёстой болов.
Умард Солонгос улсад тав хоногийн хугацаатай аялаад буцах гэж байхдаа баригдсан Отто Вармбиерын гэр бүл АНУ-ын Холбооны шүүхэд гомдол гаргаснаар хэрэг ийнхүү шийдэгджээ.
Вармбиер Виржиниагийн их сургуулийн оюутан байсан бөгөөд 2016 онд Умард Солонгос улсын Засгийн газарт баривчлагдаж, жил таван сарын хугацаанд шоронд хоригдон, тамлуулсан юм.
Вашингтоноос Умард Солонгосын талтай тохиролцож 22 настай Вармбиерыг эх нутагт нь 2017 оны зургадугаар сард авчирсан боловч ирээд долоо хонолгүй амьсгал хураажээ.
Гэр бүлийнхнийх нь хэлснээр хохирогч гэртээ ирэхэд харах, сонсох чадвараа алдсан байсан ба тархиндаа маш олон төрлийн гэмтэл авсан байжээ.
Умард Солонгосын Засгийн газар Отто Вармбиерыг байрлаж байсан зочид буудлынхаа хориотой хэсэгт нэвтэрч, улс төрийн суртал ухуулгат хуудас хулгайлсан хэмээн буруутган баривчилж, барьцааны хүн болгон хорьсон байна.
/arc-anglerfish-tgam-prod-tgam.s3.amazonaws.com/public/3PUEHDQQDZCE5O3FNSYMXFS7IU.jpg)
Хохирогчийн эцэг эх Фред болон Синди Вармбиер нар Холбооны шүүхийн шийдвэрт талархаж байгаагаа илэрхийлжээ.
Тэд зөвхөн мөнгөний төлөө бус Умард Солонгосын Засгийн газрын бурангуй үйл ажиллагааг хууль ёсны дагуу буруутгаж, олон нийтэд шударга бус дэглэмийн хор хөнөөлийг харуулж байгаадаа баяртай байна гэсэн юм.
Вармбиерын гэр бүл “АНУ-ын шүүх тогтолцоо шударга гэдгийг дэлхийд харууллаа. Оттогийн үхлийн үнэн мөнийг олох хүртлээ амар суухгүй гэдгээ бид түүндээ амласан. Оттогийн төлөө биднийг дэмжиж, тусалж байсан бүгдэд, түүнийг минь мэддэг хайрладаг бүх хүмүүст аав, ээж, ах, эгчийнх нь өмнөөс гэр бүлийнхээ өмнөөс баярлалаа” хэмээн ярьжээ.
Шүүхийн шийдвэр гарсны дараа Пхеньян болоод Ерөнхийлөгч Дональд Трампын зүгээс ямар нэг мэдэгдэл хийгээгүй байна.
Трамп Умард Солонгос улстай хийх дараагийн уулзалтаа товлохоор төлөвлөж байгаа гэдгээ зул сарын өмнөх өдөр Твиттер хуудсандаа жиргэжээ.
Эх сурвалж: www.cnn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.