Ипотекийн зээл олгох шинэ журамтай танилцана уу

Монгол улсын Засгийн газраас танилцуулсан орон сууцны хөнгөлөлттэй зээлийн санхүүжилтийн журмаас иргэдэд шууд хамаатай хэсгүүдийг онцлон танилцуулж байна. 

• 8% хүү буурах боломжгүй. Учир нь ОУВС-ийн хөтөлбөрт хамрагдаж байгаа учраас зээлийн урьдчилгаа, хүүг бууруулах боломжгүй аж.
• ОУВС-тай тохирсны дагуу 2020 оны нэгдүгээр сарын 1-нээс Ипотекийн зээлийн хөтөлбөрийг Монголбанкнаас Сангийн яаманд шилжүүлнэ. Тэр үед хүү, урьдчилгааг бууруулах боломж бүрдэнэ.
• Ипотекийн зээлийн санхүүжилтийг 500 тэрбум төгрөг болгожээ. /өмнө нь 300 тэрбум төгрөг байсан/
• Шинээр орон сууц худалдан авагч гэр хорооллыг дахин барилгажуулах нийслэлийн ерөнхий төлөвлөгөөний дагуу баригдсан орон сууцнаас л сонголт хийх боломжтой.
• Гэр хорооллын сууц барихад зориулж зээл хүсвэл 8% -ийн зээлд хамрагдах боломжтой. Өөрөөр хэлбэл орчин үеийн инженерийн байгууламж бүхий эрчим хүчний хэмнэлттэй, инженерийн дэд бүтцийн шийдэлтэй, төвлөрсөн эсвэл бие даасан шийдэлтэй сууц барьсан иргэн ипотекийн зээлд хамрагдах боломжтой. 
• Анх удаа орон сууц худалдан авч байгаа иргэн хүссэн байршилдаа сонголт хийх боломжтой.
• Нийслэлийн ерөнхий төлөвлөгөөнд тусгагдсан байршилд баригдсан орон сууцнаас сонголт хийвэл зээлд хамрагдах боломжтой.

Орон сууцны хөнгөлөлттэй зээл олгох шинэ журмын хүрээнд Сангийн яам, Монголбанк, БХБЯ гурвалсан гэрээ байгуулж, Монголбанк арилжааны банкуудтай гэрээ хийнэ. Уг гэрээгээр ипотекийн зээл олгох арилжааны банкуудын жагсаалт шинэчлэгдэн гарна. 

2019 онд орон сууцны зээлийн хөтөлбөрт улсын төсвөөс 115 тэрбум төгрөг төсөвлөсөн. Харин өмнө нь зээл авсан иргэдийн эргэн төлөлтөөс 220 тэрбум төгрөг нэмж ирэх юм байна. Энэ мөнгөөр ирэх оны ипотекийн зээлийн санхүүжүүлнэ.