Унгарын сонгуульд Виктор Орбан ялагдаж, 16 жилийн засаглал нь төгсгөл боллоо
2026 оны 4 дүгээр сарын 12-ны ням гарагт явагдсан Унгар улсын парламентын сонгуульд үндсэрхэг үзэлт Ерөнхий сайд Виктор Орбан ялагдал хүлээснээ албан ёсоор хүлээн зөвшөөрлөө.
Энэхүү түүхэн үйл явдлаар түүний 16 жил үргэлжилсэн авторитар шинжтэй засаглал эцэс болж байна. Сонгуулийн ирц 77 хувиас давсан нь тус улсын пост-коммунист түүхэн дэх хамгийн өндөр үзүүлэлт болжээ.
Сонгуульд Орбаны ойрын хүн байсан 45 настай Петер Мажараар удирдуулсан төв барууны үзэлт сөрөг хүчний "Тиса" нам үнэмлэхүй ялалт байгуулсан байна. Саналын хуудсын 96 гаруй хувийг тоолсон байдлаар тус нам үндэсний парламентын 199 суудлын 138-ыг нь авах төлөвтэй байна. Ингэснээр тэд парламентад гуравны хоёр буюу үнэмлэхүй олонх болж, үндсэн хуульд өөрчлөлт оруулах, өмнөх засгийн газрын үед батлагдсан гол хуулиудыг цуцлах бүрэн эрхтэй болж байгаа юм. Харин эрх баригч Фидес нам ердөө 55 суудал, хэт барууны үзэлт Ми Хазанк нам 6 суудал авчээ.
Санал хураалт дууссанаас хойш гурван цаг хүрэхгүй хугацааны дараа 62 настай Виктор Орбан сонгуулийн төв штабтаа үг хэлж, эрх мэдлээ шилжүүлж буйгаа мэдэгдэв.
Тэрээр үр дүнг "шархлуулсан ч эргэлзээгүй", "ойлгомжтой бөгөөд тодорхой" хэмээн тодорхойлоод, цаашид сөрөг хүчний байр сууринаас эх орондоо хүчин зүтгэхээ илэрхийлжээ.
Авлигын эсрэг, төрийн үйлчилгээг сайжруулах амлалт өгч өрсөлдсөн Петер Мажар Будапешт хотноо мянга мянган дэмжигчдийнхээ хамт ялалтаа тэмдэглэж, "Өнөөдөр бид гайхамшгийг бүтээж, Унгар улс түүх бичлээ. Энэ үдэш үнэн худал хуурмагийг ялан дийллээ" хэмээн онцолсон байна.
Энэхүү улс төрийн өөрчлөлт нь Европын холбоо болон дэлхийн геополитикт томоохон нөлөө үзүүлэхээр байна.
Орбан нь Европын холбооны шийдвэрүүд, тэр дундаа Украинд үзүүлэх тусламжид хориг тавьж, Брюссельтэй байнга зөрчилддөг байсан төдийгүй ОХУ-ын Ерөнхийлөгч Владимир Путиний хамгийн ойрын холбоотон гэгддэг байв.
Мөн түүнийг АНУ-ын Ерөнхийлөгч Дональд Трамп, Дэд ерөнхийлөгч Жей Ди Вэнс нар хүчтэй дэмжиж байсан бөгөөд Вэнс сонгуулиас хэдхэн хоногийн өмнө Будапештэд айлчилж байжээ. Харин шинээр байгуулагдах засгийн газар Европын холбоо, НАТО-той харилцаагаа сайжруулж, Украинд олгох 90 тэрбум еврогийн зээлийн гацааг гаргах хүлээлттэй байна. Европын Комиссын Ерөнхийлөгч Урсула фон дер Лейен "Унгар улс Европыг сонголоо" хэмээн энэхүү үр дүнг сайшаасан бөгөөд Мажарын засгийн газар улс орноо Европын ардчилсан замнал руу буцаан чиглүүлэхээр төлөвлөж байна.
Эх сурвалж:
• pbs.org
• time.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.