🔴Э.Батшугар: Салбарт тулгамдаж буй ашиг сонирхлын зөрчлийг цэгцэлнэ

Эрүүл мэндийн сайд Э.Батшугар салбарынхаа цаашдын бодлого, анхаарч ажиллах гол асуудлуудын талаар байр сууриа илэрхийллээ. Тэрээр өөрийгөө зөвхөн сайд гэхээсээ илүүтэй 3.5 сая иргэний эрүүл мэндийг хариуцаж буй хүн хэмээн тодорхойлж, нийгмийн эрүүл мэнд буюу иргэдийг өвдөхөөс урьдчилан сэргийлэх, өвдсөн тохиолдолд өндөр стандартаар хурдан эмчлэх гэсэн хоёр үндсэн чиглэлд анхаарлаа хандуулахаа онцлов.

Эрүүл мэндийн сайд Э.Батшугар:

-Эрүүл мэндийн даатгалын сангийн 2.4 их наяд төгрөгийн төсвийн зарцуулалтыг оновчтой болгох нь хамгийн чухал зорилтуудын нэг. Өнгөрсөн онд 2.6 сая иргэн эмнэлгийн үйлчилгээ авсан. Төрөөс 700 бүлэг өвчний 15 мянган онош болон 669 төрлийн эмэнд хөнгөлөлт үзүүлдэг. Тиймээс татвар төлөгчдийн мөнгөнөөс гарч буй нэг төгрөг бүрийг иргэдэд зөв, үр дүнтэй хүргэх тогтолцоог бүрдүүлэх шаардлагатай.

Салбарт тулгамдаж буй ашиг сонирхлын зөрчил, ялангуяа эм, эмнэлгийн тоног төхөөрөмжийн худалдан авалттай холбоотой асуудлыг цэгцлэхээр төлөвлөж байна. Одоогийн байдлаар нэг ижил эмийг эмнэлгүүд өөр өөр үнээр тендер зарлан худалдан авч байгаа. Цаашид улсын эмнэлгүүдийн хэрэгцээг нэгтгэн "Нэг худалдан авагч"-ийн тогтолцоонд шилжүүлэнэ. Ингэснээр бөөнөөр худалдан авалт хийж, үнийг бууруулан иргэдэд хямд өртгөөр үйлчлэх боломж бүрдэнэ.

Эмийн чанарын тухайд монопол компаниудыг буруутгахаас илүүтэй тогтолцоогоо сайжруулах нь зүйтэй. Хамгийн чанартай, хямд өртөгтэй эм оруулж ирсэн нийлүүлэгчээс худалдан авалт хийх зарчим баримтлах бөгөөд дотоодын стандартыг чанд мөрдүүлэхэд анхаарна. Мөн АНУ-ын Хүнс, эмийн чанарын хяналтын газар (FDA) болон Европ, Япон, БНСУ зэрэг өндөр хөгжилтэй орнуудын стандартыг хангасан эмийг Монголд түргэвчилсэн горимоор нэвтрүүлэх бодлого баримтлана. 

Эрүүл мэндийн байгууллага, тэр дундаа дүүргийн эрүүл мэндийн төвүүдийн удирдлагын томилгоонд улс төрийн өнцгөөр хандах нь буруу. Хүний амь нас, эрүүл мэндтэй шууд холбоотой салбар учраас томилгоо нь улс төрөөс ангид, цэвэр мэргэжлийн түвшинд хийгдэх ёстой. Цаашид шаардлагатай бол томилгооны өөрчлөлтүүдийг хийх бөгөөд удирдах албан тушаалтан нь хамт олон, салбартаа хүлээн зөвшөөрөгдсөн мэргэжлийн хүн байх ёстой гэсэн хатуу зарчим баримтлан ажиллана гэв.