🔴 Н.Номтойбаяр: Төрийн албан хаагчид нэг өдөр гэрээсээ онлайнаар ажиллах боломжтой боллоо

Засгийн газрын ээлжит хуралдаанаар хэлэлцсэн асуудлууд болон гаргасан шийдвэрүүдийн талаар Монгол Улсын Шадар сайд Н.Номтойбаяр болон холбогдох салбарын сайд нар мэдээлэл хийлээ. Өнөөдрийн хуралдаанаар нийт 23 асуудал хэлэлцэж, Ерөнхий сайдын зүгээс салбарын сайд нарт хандан 49 үүрэг чиглэл бүхий албан даалгавар өгсөн байна.

Шадар сайд Н.Номтойбаяр хувийн хэвшлийг дэмжих хүрээнд томоохон шийдвэрүүд гаргаснаа онцлов. Тухайлбал, үйл ажиллагаа нь саатсан 2100 орчим компанийн дансыг нээх, мөн нийгмийн даатгалын шимтгэлийн өрөөс шалтгаалан данс нь хаагдсан 3800 орчим аж ахуйн нэгжийн дансыг чөлөөлөх шийдвэр гаргажээ. Түүнчлэн Улсын онцгой комиссын нөөцөөс 5.3 тэрбум төгрөгийн үнэ бүхий техник, тоног төхөөрөмжийг шаардлагатай газруудад хуваарилахаар болсон байна.

Засгийн газраас хувийн хэвшлийн үйл ажиллагаанд учруулдаг төрийн дарамтыг багасгах зорилгоор 2024 онд хийхээр төлөвлөсөн 9376 хяналт шалгалтыг цуцалжээ. Энэхүү шийдвэр нь аж ахуйн нэгжүүд хэвийн үйл ажиллагаа явуулах боломжийг бүрдүүлэх бөгөөд зөвхөн иргэдийн өргөдөл гомдол болон өндөр эрсдэлтэй нөхцөлд төлөвлөгөөт бус шалгалтыг хийх юм байна.

Ойрх Дорнодод үүсээд буй зөрчилдөөн нь Монгол Улсын эдийн засагт шууд болон шууд бусаар нөлөөлж байгааг Эдийн засгийн хөгжлийн сайд Ж.Энхбаяр танилцуулсан. Үүнтэй холбогдуулан стратегийн бүтээгдэхүүний үнийн өсөлтөөс сэргийлэх, нөөц бүрдүүлэх шат дараалсан арга хэмжээ авахаар тогтжээ. Тухайлбал, шатахууны нөөц хадгалах савны багтаамжийг нэмэгдүүлж, ирэх он гэхэд нэг сарын хэрэглээг хангах буюу 285 мянган тонн нөөц хадгалах хүчин чадалтай болохоор ажиллаж байна.

Аж үйлдвэр, эрдэс баялгийн салбарт түүхэн шийдвэр гарч, Дархан-Уул аймагт жилд нэг сая тонн ган үйлдвэрлэх хүчин чадалтай "Гангийн цогцолбор" барих олон улсын нээлттэй сонгон шалгаруулалтыг зарлалаа. 800 гаруй сая долларын хөрөнгө оруулалттай энэхүү төсөл хэрэгжсэнээр 1700 байнгын ажлын байр бий болж, барилгын материалын импортын хамаарал буурах ач холбогдолтой юм. Мөн зэс хайлуулах болон алт цэвэршүүлэх үйлдвэрийн төслүүд эхлэхэд бэлэн болжээ.

Хөдөө аж ахуйн салбарт хаврын тариалалтыг дэмжих зорилгоор 10 мянган тонн дизель түлшийг хөнгөлөлттэй үнээр нийлүүлэх, хүнсний ногооны үр болон хүлэмжийн аж ахуйд зориулж хөнгөлөлттэй зээл олгохоор шийдвэрлэв. Түүнчлэн ОХУ-аас 5000 тонн төмсний үр татан авах ажил хийгдэж байна. Нийслэлийн махны хангамжийг тогтворжуулах хүрээнд нөөцийн махны түгээлтийг эрчимжүүлэх үүргийг Хотын даргад өгчээ.

Төрийн албаны шинэчлэлийн хүрээнд төрийн албан хаагчдын ажлын ачааллыг бууруулах, бүтээмжийг нэмэгдүүлэх зорилгоор уян хатан цагийн зохицуулалтад шилжлээ. Төрийн байгууллагууд дотоод журмаараа ажлын цагийг 07:30-аас эхлүүлж, 16:00 цагт дуусгах боломжтой болсон бөгөөд долоо хоногийн нэг өдөр зайнаас ажиллах хувилбарыг салбарын онцлогт тохируулан шийдвэрлэх эрхийг сайд нарт олгосон байна. Мөн төрийн байгууллагууд хоорондоо цаасаар тайлан солилцохыг зогсоож, нэгдсэн цахим систем (Dashboard) ашиглахаар боллоо.