Хятад улс иргэний дрон ашиглалтад дэлхийн хамгийн хатуу хязгаарлалт тогтоолоо
БНХАУ-ын Засгийн газар иргэний нисгэгчгүй нисэх төхөөрөмж буюу дроны салбарт хяналтаа эрс чангатгаж, 2026 оны тавдугаар сарын 1-ний өдрөөс эхлэн дэлхийн хамгийн хатуу зохицуулалтыг мөрдөж эхлэхээр боллоо.
"Тэнгэрийг түгжих" гэж нэрлэгдээд буй энэхүү шийдвэр нь Бээжингийн зүгээс "нам өндрийн эдийн засаг"-ийг дэмжих бодлого баримталж буй үед гарч байгаагаараа онцлог юм.
Шинэ журмын дагуу бүх иргэний дронууд хөөрсөн цагаасаа эхлэн газардах хүртэлх нислэгийн мэдээллээ төрийн серверт бодит хугацаанд дамжуулах үүрэг хүлээж байна.
Шинээр мөрдөгдөх журмын хүрээнд дроны техник хангамжид тавих шаардлага өндөрсөж, төхөөрөмж бүр устгах боломжгүй 120-оос доошгүй цагийн алсын зайн таних өгөгдлийг хадгалах ёстой болсон. Одоо байгаа дроны эзэмшигчид 2026 оны дөрөвдүгээр сарын 30-ны дотор цагдаагийн байгууллагад өөрийн нэр дээр бүртгүүлэх шаардлагатай бөгөөд энэ хугацаанаас хойш бүртгэлгүй дрон эзэмшихийг бүрмөсөн хориглоно.
Мөн хотуудын ихэнх хэсгийг хамарсан "хязгаарлалтын бүс"-д нислэг үйлдэх бүрд урьдчилан зөвшөөрөл авах шаардлагатай болж, зөвшөөрөлгүй нислэг үйлдсэн тохиолдолд хорих ял оноох хүртэл арга хэмжээ авахаар заажээ.
Нийслэл Бээжин хотод бүр ч хатуу хязгаарлалт тогтоосон нь бусад хотуудад жишиг болохуйц байна. Тухайлбал, Бээжингийн зургаадугаар тойрог зам доторх нэг хаяг дээр гурваас дээш дрон эсвэл 10-аас дээш үндсэн эд анги хадгалахыг хориглолоо. Түүнчлэн олон нийтийн аюулгүй байдлын байгууллагын тусгай зөвшөөрөлгүйгээр дрон болон түүний эд ангийг Бээжин рүү худалдах, түрээслэх, тээвэрлэхийг зогсоосон байна. Бусад мужаас Бээжин рүү нэвтэрч буй зорчигчдын ачаа тээшинд дрон байгаа эсэхийг шалгах тусгай хяналтын цэгүүдийг ажиллуулж эхэлжээ.
Энэхүү хатуу хяналт нь дроны зах зээлд томоохон өөрчлөлт авчирч, хувь хэрэглэгчдийн дунд борлуулалт эрс буурч, хуучин дрон зарах зар ихэссэн байна. Гэсэн хэдий ч Хятадын засгийн газар төрийн хяналт дорх хүргэлт, хөдөө аж ахуй, үйлдвэрлэлийн засвар үйлчилгээнд суурилсан "нам өндрийн эдийн засаг"-ийг 2026 оны эцэс гэхэд 1 их наяд юань буюу 138 тэрбум ам.долларт хүрнэ гэж тооцоолж байна.
Олон нийтийн сүлжээгээр DJI компанийн "Тэнгэрийг удаан хүлээлгэх хэрэггүй" гэсэн уриаг "Цагдааг удаан хүлээлгэх хэрэггүй" хэмээн егөөдсөн хошигнол газар авчээ.
Олон улсын түвшинд ч Хятадын дроны салбарт шахалт ирсээр байна. 2025 оны сүүлээр АНУ-ын Холбооны Харилцаа Холбооны Комисс (FCC) DJI болон Autel зэрэг компаниудыг хориглосон жагсаалтад оруулснаар 2026 оноос эхлэн эдгээр брэндийн шинэ загварууд АНУ-д худалдаалагдах боломжгүй болсон. Хятад улс өөрөө ч өндөр хүчин чадалтай дроны эд ангийн экспортыг барууны орнуудад хязгаарлаж байгаа нь дэлхийн нийлүүлэлтийн сүлжээнд нөлөөлж эхэллээ. Цаашид иргэний хэрэглээг хумихын зэрэгцээ ачаа тээвэр, цэргийн зориулалттай том оврын системүүдийг хөгжүүлэхэд Бээжин гол анхаарлаа хандуулах төлөвтэй байна.
Эх сурвалж:
• scmp.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.