🔴 Ж.Энхбаяр: Засгийн газрын яамд, салбар хоорондын уялдааг хангахад анхаарч ажиллана

Тэргүүн шадар сайд Ж.Энхбаяр Эдийн засаг, хөгжлийн яамны чиг үүрэг болон цаг үеийн эдийн засгийн нөхцөл байдлын талаар мэдээлэл өглөө. Тэрбээр тус яам нь Монгол Улсын нийгэм, эдийн засгийн хөгжлийн гол бодлого, төсвийн хүрээ болон хөгжлийн үндсэн чиглэлүүдийг боловсруулахын зэрэгцээ Засгийн газрын яамд, салбар хоорондын уялдааг хангаж, тогтвортой ажиллахад анхаарлаа хандуулан ажиллахаа онцолсон юм.

Тэргүүн шадар сайд Ж.Энхбаяр: 

Дэлхий дахинд үүсээд буй нөхцөл байдлаас шалтгаалан төсөв, санхүүгийн бодит хүндрэлүүд тулгарч байна. Тухайлбал, шатахууны үнэ болон агаарын тээврийн тийзийн үнэ нэмэгдэж байгаа нь эдийн засагт томоохон сорилт болж байгаа юм. Одоогийн хэрэгжиж буй төсвийн хуулиар энэхүү хямралт нөхцөлийг даван туулахад хүндрэлтэй байгаа тул салбар хоорондын зохицуулалт хийх шаардлага үүссэн. 

Үүнтэй холбогдуулан үнийн өсөлтийн эсрэг гааль болон НӨАТ-ын татварт өөрчлөлт оруулах, зарим төсөл хөтөлбөрийг царцааж, тэргүүлэх ач холбогдолтойг нь урагшлуулах зохицуулалтыг Засгийн газрын хуралдаанаар хэлэлцүүлж, УИХ-д өргөн барихаар бэлтгэж байна.  Хөгжлийн бодлогын хүрээнд 2026-2030 он хүртэл хэрэгжүүлэх 87 томоохон хөтөлбөр, зорилт байгаа. 

Нийслэлийн хөгжлийн төслүүдийн тухайд улсын хөгжлийн үндсэн чиглэлд тусгагдсан бөгөөд Нийслэлийн Иргэдийн Төлөөлөгчдийн Хурал төсвөө баталж, хэрэгжилтийг хангаж ажиллана. Одоогоор 2027 оны хөгжлийн бодлого болон төсвийн хүрээний мэдэгдлийг УИХ-д өргөн барихаар бэлтгэж байгаа бөгөөд Сангийн яамтай хамтран төсвийн төлөвлөлтийг хийж байгаа. 

Шинэ Засгийн газрын бүрэлдэхүүн болон улс төрийн нөхцөл байдлын тухайд тодорхой хэмжээний өрсөлдөөн, улс төр өрнөсний эцэст шийдэл гарч, төрийн үйл ажиллагаа тасралтгүй явах боломж бүрдлээ. Сайд нарын томилгоотой холбоотой шүүмжлэлд "Засгийн газрын кабинетаа бүрдүүлэх нь Ерөнхий сайдын онцгой бүрэн эрх бөгөөд эрх барьж буй намын даргын хувьд Засгийн газрын тогтвортой байдлыг хангах үүднээс саналаа оруулсан" гэлээ.