🔴 Ж.Энхбаяр: Парламент олон намын тогтолцоонд шилжсэнээр бодлогын мэтгэлцээний индэр болно

УИХ-ын гишүүн Ж.Энхбаяр Үндсэн хуулийн өөрчлөлтийн ач холбогдол болон парламентын шинэ тогтолцооны талаар байр сууриа илэрхийллээ. Тэрбээр 126 гишүүнтэй болсноор Монгол Улсын парламент олон намын тогтолцоонд шилжиж, цаашид эвслийн засгийн газрууд тогтмол байгуулагдах нөхцөл бүрдэж байгааг онцлов. Энэхүү өөрчлөлт нь УИХ-ыг улс төржилтөөс ангид, бодлогын мэтгэлцээний чөлөөт индэр болгох чухал шаардлагыг бий болгож байгаа бөгөөд МАН-ын бүлэг энэхүү шинэчлэлийг дэмжиж байгааг тэрбээр хэллээ.

Улс төрийн намуудын төлөвшлийг сайжруулах чиглэлээр хийгдсэн эрх зүйн шинэчлэлийн талаар Ж.Энхбаяр хэлэхдээ, намуудыг илүү хариуцлагажуулж, дотоод ардчиллыг нь бэхжүүлсэн гэлээ. МАН-ын хувьд үзэл бодлын зөрүүтэй асуудлууд гардаг ч дотооддоо ойлголцож, нэгдсэн шийдвэрт хүрч чаддаг нь тус намын оршин тогтнох үндэс болдог байна. Намууд дүрмээ шинэчилж, дотоод сонгуулиа явуулж дууссанаар парламентын засаглал, үндэсний аюулгүй байдлын баталгаа улам бэхжих суурь тавигдсаныг тэрбээр тодотгов.

Засгийн газрын бүрэлдэхүүнийг томилох асуудалд Үндсэн хуулийн нэмэлт, өөрчлөлтөөр томоохон шинэчлэл хийгдсэнийг тэрбээр онцоллоо. Өмнө нь сайд нарыг томилохдоо улс төрийн фракцуудын шахаанд орж, олон хоногоор гацдаг байсан бол одоо Ерөнхий сайд кабинетын гишүүдээ өөрөө бие даан бүрдүүлж, УИХ-д танилцуулах онцгой эрхтэй болсон. Энэ нь гүйцэтгэх засаглалыг улс төрийн бүлэглэлүүдийн барьцаанаас гаргаж, Ерөнхий сайд 100 хувь өөрийн бүрэн эрхийн хүрээнд багаа бүрдүүлэх боломжийг олгож байгаа юм.

Гадаад орчны тодорхойгүй байдал болон эдийн засгийн эрсдэлтэй холбогдуулан яаралтай хариу арга хэмжээ авах төлөвлөгөө бэлэн болсныг Ж.Энхбаяр мэдээлэв. Ковидын үеийн хуулийг боловсруулж байсан туршлагадаа үндэслэн, хямралыг хохирол багатай давахын тулд төсөвт зохицуулалт хийх, гааль болон НӨАТ-ын татварын уян хатан бодлого хэрэгжүүлэх маневр хийх эрхийг Засгийн газарт олгох шаардлагатайг тэрбээр хэллээ. Шинэ засгийн газар бүрдмэгц энэхүү яаралтай төлөвлөгөөг УИХ-аар хэлэлцүүлж, эрх зүйн орчныг нь бүрдүүлэхээр ажиллаж байгаа ажээ.