О.Алтангэрэл: Төрийг хүчээр, өс хонзонгоор бус зарчмаар удирдах ёстой

УИХ-ын гишүүн О.Алтангэрэл чуулганы хуралдааны үеэр Ардчилсан намаас тавьж буй зарчмын шаардлага болон шинээр өргөн барьсан хуулийн төслийн талаар байр сууриа илэрхийллээ. Тэрбээр өнгөрсөн хугацаанд АН-ын зүгээс ганцхан зарчмын шаардлага тавьж ирсэн нь УИХ-ыг удирдаж буй хүн нам бус байх, парламентад намын эрх ашгийг тулгахгүй байх асуудал гэдгийг онцлов.

Энэхүү шаардлага нь ямар нэгэн албан тушаал, сайдын суудлын төлөөх тохиролцоо биш бөгөөд зөвхөн парламентын засаглалын мөн чанарыг хадгалахад чиглэсэн гэдгийг тэрбээр тодотгосон юм. Гэвч эрх баригчдын зүгээс уг зарчмын шаардлагыг "төрийн ажлыг гацаалаа" хэмээн шүүмжилж, гишүүдийг суудалд нь суулгахыг шаардаж ирснийг О.Алтангэрэл гишүүн шүүмжиллээ.

Тэрбээр, "Төрийг хүчээр, уураар, өс хонзонгоор удирдаж болохгүй. Өнөөдөр Монголын ард түмэн бүгдийг харж байна. Бидний тавьж буй гол шаардлага бол УИХ-ыг намчирхсан хандлагаар бүү удирдаач ээ, төрийн дээр намыг бүү гаргаач ээ гэдэгт оршиж байгаа юм. Үүнийг хэрэгжүүлэх үндэс нь өнөөдрийн бидний санаачилсан хуулийн төсөл юм" гэлээ.

Мөн түүний танилцуулсан хуулийн төсөлд Хяналт шалгалтын түр хороо байгуулах процессыг боловсронгуй болгох зохицуулалт тусгагджээ. Өмнө нь гишүүд тодорхой асуудлаар хяналтын хороо байгуулах гэхээр дараалал үүсдэг, гишүүд хоорондоо муудалцаж, ажил гацдаг байсан гажуудлыг засахаар төлөвлөсөн байна.

О.Алтангэрэл гишүүн Монгол төрийг намчирхсан хандлагаас ангид байлгаж, хууль дээдлэх ёсыг бэхжүүлэхэд энэхүү хуулийн төсөл чухал ач холбогдолтойг тэмдэглээд, гишүүдийг дэмжиж ажиллахыг уриаллаа.