🔴 Т.Мөнхсайхан: Хавдрын эмнэлгийн барилгад 800 орчим тэрбум төгрөг шаардлагатай байхад төрийн ажил гацчихлаа

УИХ-ын гишүүн Т.Мөнхсайхан Хавдрын шинэ эмнэлэг барих төслийн явц болон цаг үеийн асуудлаар мэдээлэл өглөө. Тэрбээр олны анхаарлын төвд байгаа хавдрын эмнэлгийн төслийн зураг төсөв бэлэн болж, газар нь шийдэгдсэн байгааг хэллээ. Энэ оны улсын төсөвт дэд бүтэц болон бусад бэлтгэл ажлыг хангахад зориулж 30 тэрбум төгрөг тусгагдсан байна.

Гэвч эмнэлгийн барилгыг бүрэн барьж ашиглалтад оруулахад нийт 700-аас 800 орчим тэрбум төгрөгийн санхүүжилт шаардлагатай байгаа аж. Уг санхүүжилтийг БНСУ-ын "Эгзим" банкны нэн хөнгөлөлттэй зээлээр шийдвэрлэх асуудал Засгийн газрын түвшинд нэлээдгүй яригдаж байгаа аж.

Тэрбээр УИХ-ын даргыг томилох асуудлаас үүдэн төрийн ажил гацаж, хууль тогтоох үйл ажиллагаа удааширч байгаад харамсаж буйгаа илэрхийллээ. "Бид нарт батлах хууль, хийх ажил маш их байна. Энэ сандал ширээний асуудлыг хурдан дуусгаж, төрийн ажлыг нэг цаг ч алдалгүй үргэлжлүүлэх шаардлагатай байна. Төрийн ажил гацсаны үр дүнд эргээд ард иргэд л хохирдог" гэлээ.

Олон улсын нөхцөл байдал амаргүй байгаа нь манай улсын нийгэм, эдийн засагт сөрөг нөлөө үзүүлэх нь тодорхой байгаа тул үүний эсрэг авах арга хэмжээг яаралтай хэлэлцэх ёстой. Түүнийг Эрүүл мэндийн сайдаар томилох тухай яригдаж буй асуудалд "Ерөнхий сайдын зүгээс ямар нэгэн санал тавиагүй" гэх тайлбарыг өгсөн юм.