🔴 Э.Болормаа: Таван намын төлөөлөл багтсан парламeнтын дарга нэг намаас байж болохгүй

УИХ-ын гишүүн Э.Болормаа УИХ-ын даргыг томилох асуудал болон намын бүлгийн уур амьсгалын талаар байр сууриа илэрхийллээ. Тэрбээр энэ удаагийн томилгоонд хувь хүн бус, зарчмын асуудал нэгдүгээрт тавигдах ёстойг онцлон тэмдэглэв.

Э.Болормаа гишүүний хэлснээр, Ерөнхий сайдыг томилохдоо намын дарга нь гүйцэтгэх засаглалаа тэргүүлэх ёстой гэсэн дүрмийн дагуу нэгдмэл байр суурьтай байсан бол УИХ-ын даргын тухайд парламент шинэ шатанд гарч буй энэ үед илүү хариуцлагатай хандах шаардлагатай байгаа аж. Тэрбээр "Бид хоёр жил хүрэхгүй хугацаанд гурав дахь УИХ-ын даргаа томилох гэж байна. Энэ болгон нь парламентын төлөвшилд томоохон сорилт болж байна" хэмээн хэллээ.

Монгол Улсын парламент анх удаа таван намын төлөөлөлтэй, 126 гишүүнтэй болж өргөжсөн нь засаглалын тогтолцоо төгөлдөржих түүхэн үе юм. Энэ утгаараа УИХ-ын дарга нь намын үйл ажиллагаанаас хараат бус байх ёстой гэсэн шаардлагыг Э.Болормаа гишүүн хувь хүнийхээ хувьд дэмжиж байгаагаа илэрхийлэв. Тэрбээр өнгөрсөн хоёр жилийн хугацаанд ажиллахдаа яг энэ зарчим алдагдсанаас үүдэж улс төрийн тогтворгүй байдал үүсдэг гэх дүгнэлтэд хүрсэн байна.

Нэр дэвшигчдийн тухайд, "Энэ бол С.Бямбацогт болон бусад нэр дэвшигчтэй холбоотой хувь хүний асуудал огт биш. Бид аливаа хүнийг томилохоос өмнө зарчмаа нэг талдаа гаргах нь зүйтэй. 126 гишүүнтэй парламент ард түмний төлөөлөл болоод энд асуудлаа хэлэлцэх ёстой болохоос биш, бүх шийдвэр зөвхөн намын байран дээр гардаг байж болохгүй" гэв.

Эцэст нь тэрбээр улс төрийн тогтвортой байдлыг хангахын тулд парламентын засаглалыг бэхжүүлэх, намын нөлөөллөөс ангид байх зарчмыг баримтлах нь ирэх жилүүдийн ажилд шийдвэрлэх үүрэгтэйг санууллаа. Хэрэв энэ тогтолцооны алдааг одоо засахгүй бол шинэ парламентын хувьд харамсалтай үр дагавар авчирч болзошгүйг анхааруулсан юм.