Хүрхрээнээс унаж сураггүй болсон нохой 14 хоногийн дараа эсэн мэнд олджээ
Шинэ Зеландын Өмнөд арлын Арахура хөндийд хүрхрээнээс унаж, зэрлэг байгальд 14 хоногийн турш сураггүй байсан Молли нэртэй бордер-колли үүлдрийн нохойг эсэн мэнд олж, эзэн Жессика Жонстонтой нь уулзуулжээ.
Өнгөрсөн гуравдугаар сарын 17-нд болсон ослын дараа эрэн хайх ажиллагаа тасралтгүй үргэлжилсээр, гуравдугаар сарын 31-ний өдөр дулаан мэдрэгч бүхий тусгай төхөөрөмжийн тусламжтайгаар нохойг олж тогтоосон байна.
Осол гуравдугаар сарын 17-ны өдөр Кэмпбелл Бивуак орчмын алслагдсан бүсэд болжээ. Жессика Жонстон нохойгоо тэврээд явж байхдаа 55 метрийн өндөртэй хүрхрээнээс доош унасан байна. Тэрээр хүнд гэмтэл авч, хүрхрээний бэлд долоо хоногийн турш тусламж хүлээсний эцэст гуравдугаар сарын 24-нд нисдэг тэргээр аврагдсан боловч Моллиг өтгөн ширүүн ой шугуйгаас олж чадалгүй үлдээхээс өөр аргагүй болсон юм.
Эрэн хайх ажиллагааг "Precision Helicopters" компанийн нисгэгч Мэтт Ньютон удирдан зохион байгуулжээ.
Тэрээр эмнэлэгт хэвтэж байсан Жессикатай холбогдож, эрэн хайх ажиллагааг үргэлжлүүлэхээ амласан байна. Шаардлагатай тоног төхөөрөмж болон нислэгийн зардлыг санхүүжүүлэхийн тулд Ньютоны гэр бүлийнхэн хандив цуглуулж эхэлсэн бөгөөд олон нийтийн зүгээс 11,000 гаруй Шинэ Зеланд доллар (ойролцоогоор 6,300 ам.доллар) цугларчээ.
Гуравдугаар сарын 31-ний мягмар гарагт эрлийн баг дулаан мэдрэгч камер ашиглан хүрхрээний ойролцоо амьд биетийн дулаан ялгарч байгааг илрүүлсэн байна. Нисдэг тэрэг тухайн газарт ойртож, сайн дурын ажилтан Бинго нэртэй аврагч нохойн хамт буужээ. Бинго айж сандарсан Моллиг тайвшруулж, нисдэг тэрэг рүү дагуулан ирсэн байна. Молли анх осол болсон газраас ердөө хэдхэн метрийн зайд байжээ.
Зэрлэг байгальд 14 хоногийн турш ганцаараа байсан Моллиг зэрлэг амьтдын сэг зэмээр хооллож амьд үлдсэн байж магадгүй гэж нисгэгч Мэтт Ньютон таамаглаж байна. Хэдийгээр өлсөж ядарсан байсан ч нохойн биеийн байдал гайхмаар сайн байсан бөгөөд аврагдсанаасаа хэдхэн цагийн дараа эмнэлгээс дөнгөж гарсан эзэнтэйгээ учран золгожээ.
Олон нийтийн тусламж болон орчин үеийн технологийн хослолоор нэгэн гайхамшиг ийнхүү бүтжээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.