Багдад хотод Америкийн нэрт сэтгүүлчийг хулгайлжээ
Иракийн нийслэл Багдад хотын төв хэсэгт Америкийн нэрт сэтгүүлч Шелли Киттлсоныг 2026 оны 3-р сарын 31-ний мягмар гаргийн орой үл таних этгээдүүд хулгайлан авч явсан хэрэг гарчээ.
Саадун гудамжинд байрлах "Baghdad Hotel"-ын ойролцоо болсон уг хэргийн үеэр иргэний хувцастай дөрвөн эрэгтэй түүнийг хүчээр автомашинд суулган авч явсан бөгөөд хэргийн газарт хоёр тээврийн хэрэгсэл ашигласан болохыг хяналтын камерын бичлэг болон гэрчүүдийн мэдүүлэг баталж байна.
Иракийн аюулгүй байдлын хүчнийхэн барьцаалагчдыг Бабил муж руу чиглэн зугтах үед нь шуурхай мөрдөн хөөсөн байна. Хөөх явцад гэмт этгээдүүдийн ашиглаж байсан нэг автомашин Мусайяб хотын ойролцоох Аль-Haswa суурингийн орчимд онхолджээ. Хэдийгээр ослын газраас нэг сэжигтнийг баривчилж, автомашиныг хураан авсан ч сэтгүүлч Шелли Киттлсон тухайн машинд байгаагүй бөгөөд түүнийг өөр тээврийн хэрэгсэл рүү шилжүүлэн авч явсан гэж албаныхан үзэж байна.
АНУ болон Иракийн албаны эх сурвалжууд уг хэргийг Ираны дэмжлэгтэй зэвсэгт бүлэглэл болох "Катаиб Хезболла"-тай холбон тайлбарлаж байна. АНУ-ын Төрийн нарийн бичгийн даргын туслах Дилан Жонсоны мэдээлснээр, Киттлсоныг Иракт ирэхээс өмнө тус бүлэглэлийн зүгээс ирж болох аюул заналын талаар АНУ-ын засгийн газраас удаа дараа анхааруулж байжээ. Түүний нэр тус бүлэглэлийн бай болох хүмүүсийн жагсаалтад орсон тухай хамгийн сүүлд даваа гаргийн орой дахин сануулсан болохыг эх сурвалжууд онцоллоо.
Одоогоор АНУ-ын Төрийн департамент, Холбооны мөрдөх товчоо (FBI) болон Иракийн Терроризмтой тэмцэх алба хамтран сэтгүүлчийг суллахаар ажиллаж байна. Иракийн Дотоод хэргийн яамнаас хэргийг дээд түвшинд хяналтдаа авч, зугтсан бусад этгээдүүдийг эрэн сурвалжлах хээрийн ажиллагааг эрчимжүүлсэн гэж мэдэгдэв. АНУ-ын зүгээс Ирак улс руу зорчихгүй байх "4-р түвшний" зөвлөмж хүчинтэй хэвээр байгааг энэ үеэр дахин санууллаа.
Шелли Киттлсон нь "Al-Monitor", "Foreign Policy", "Politico" болон "BBC" зэрэг дэлхийн томоохон хэвлэл мэдээллийн хэрэгслүүдтэй хамтран ажилладаг, Ойрхи Дорнодын мөргөлдөөн, аюулгүй байдлын чиглэлээр мэргэшсэн туршлагатай сэтгүүлч юм. Түүний хамтран ажилладаг "Al-Monitor" агентлаг болон Сэтгүүлчдийг хамгаалах хороо (CPJ) зэрэг байгууллагууд уг явдалд гүнээ түгшиж буйгаа илэрхийлж, сэтгүүлчийг нэн даруй суллахыг шаардаж байна. Одоогоор эрэн сурвалжлах ажиллагаа Багдадын зүүн хэсэг болон Бабил мужийн чиглэлд үргэлжилж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.