В.Путин Оросын тэрбумтнуудаас төсвийн алдагдлыг нөхөхөд санхүүгийн тусламж хүсжээ
ОХУ-ын Ерөнхийлөгч Владимир Путин Украины дайн тав дахь жилдээ үргэлжилж, улсын төсөвт ихээхэн ачаалал ирж байгаатай холбогдуулан Оросын тэрбумтнуудаас төсвийн алдагдлыг нөхөхөд зориулж "сайн дурын" санхүүгийн тусламж үзүүлэхийг хүсжээ.
Москва хотноо болсон Оросын Үйлдвэрлэгч, бизнес эрхлэгчдийн холбооны (РСПП) 35 дугаар их хурлын дараа Путин томоохон бизнес эрхлэгчидтэй хаалттай уулзалт хийж, цэргийн зардлаас үүдэлтэй төсвийн цоорхойг нөхөхөд хувь нэмрээ оруулахыг шууд хүссэн байна.
Энэхүү санаачилга нь цэргийн зориулалттай холбооны зээлийн бонд гаргах болон төрд "сайн дурын хандив" өгөх хэлбэрээр хэрэгжихээр төлөвлөгджээ. "Роснефть" компанийн гүйцэтгэх захирал Игорь Сечин анх энэхүү төлөвлөгөөг Кремльд санал болгосон бөгөөд үүнийг шинжээчид "Сечиний төлөвлөгөө" гэж нэрлэж байна. Кремлийн хэвлэлийн төлөөлөгч Дмитрий Песков уг алхмыг бизнес эрхлэгчид 1990-ээд оны "өрийг" төлж, хүнд хэцүү цагт төр засагтаа туслах нь тэдний эх оронч үүрэг хэмээн тайлбарлажээ.
Уулзалтын үеэр зарим тэрбумтнууд аль хэдийн томоохон амлалт өгөөд байна. Тухайлбал, Дагестаны тэрбумтан, Сенатор Сулейман Керимов 100 тэрбум рубль буюу ойролцоогоор 1.23 тэрбум ам.доллар хандивлахаа мэдэгджээ. Харин тэрбумтан Олег Дерипаска хандив өгөхөд бэлэн байгаагаа илэрхийлсэн ч эдийн засгийн нөхцөл байдалд санаа зовж буйгаа нуугаагүй байна. Тэрээр Оросын иргэдийг дэлхийн эдийн засгийн "гүн өөрчлөлт"-ийг даван туулахын тулд өдөрт 12 цаг, долоо хоногийн зургаан өдөр ажиллах горимд шилжихийг санал болгосон нь олны анхаарлыг татлаа.
ОХУ-ын төсвийн нөхцөл байдал эрчим хүчний орлого буурч, дайны зардал огцом өссөнөөс болж туйлын хүндэрсэн байна. 2026 оны эхний хоёр сарын байдлаар төсвийн алдагдал жилийн төлөвлөгөөний 90 хувьд хүрч, батлан хамгаалахын зардал өмнөх оныхоос 42 хувиар өсжээ.
Үүнтэй холбогдуулан Оросын засгийн газар НӨАТ-ыг 20-оос 22 хувь болгон нэмэгдүүлж, дотоодын зах зээл дэх шатахууны үнийг тогтворжуулах зорилгоор дөрөвдүгээр сарын 1-нээс долоодугаар сарын 31-нийг хүртэл бензиний экспортыг бүрэн хориглох шийдвэр гаргаад байна.
Хаалттай уулзалтын үеэр Путин байлдааны ажиллагааг зогсоох бодолгүй байгаагаа тодорхой илэрхийлж, цэргийн гол зорилго нь Донбасс бүс нутгийн хилд хүрэх явдал гэдгийг онцолжээ.
Тэрээр бизнес эрхлэгчдэд хандан "Бид тулалдах болно" хэмээн мэдэгдсэн нь Оросын эдийн засаг болон хувийн хэвшлийнхэнд ирэх дарамт цаашид ч үргэлжлэх төлөвтэй байгааг харуулж байна. Кремлийн зүгээс эдгээр хандивыг бизнес эрхлэгчдийн хувийн санаачилга гэж тодорхойлж байгаа ч энэ нь төсвийн хямралыг даван туулах арга ядсан алхам гэж ажиглагчид дүгнэж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.