🔴Ж.Баясгалан: Дэд сайдтай байх ямар ч хэрэггүй

Шинэ Засгийн газрын бүтэц, бүрэлдэхүүний асуудлаар УИХ-ын гишүүд байр сууриа илэрхийлж байна. Шинэ томилогдох сайд нар өмнөх Засгийн газрын хэрэгжүүлж байсан зөв бодлого, үйл хэргийг үргэлжлүүлж, төрийн залгамж халааг хадгалах нь нэн тэргүүний зорилт байх ёстой хэмээн УИХ-ын гишүүн Ж.Баясгалан дараах байр суурийг илэрхийлэв.

УИХ-ын гишүүн Ж.Баясгалан:

-Засгийн газрын бүрэлдэхүүнд эмэгтэйчүүдийн төлөөллийг нэмэгдүүлж, жендерийн мэдрэмжтэй ажиллах нь чухал. Мөн Ардчилсан намын бүлгийн зүгээс яамдын тоог цөөлөх, дэд сайдын албан тушаалыг үгүй болгох замаар төрийг цомхон, чадварлаг бүтэцтэй болгох шаардлагыг тавьж байгаа. Төр данхайх тусам иргэдийн боломж хязгаарлагддаг тул гүйцэтгэх засаглал нь хууль тогтоох дээд байгууллагаасаа хараат бус, "дан дээлтэй" ажиллах зарчмыг баримтлах нь зүйтэй гэж үзэж байна.

Түүнчлэн 21 аймгийг тойрч иргэдтэй уулзах үеэр хөгжлийн бэрхшээлтэй иргэдийн эрхийг хамгаалах, тэдний нийгмийн асуудлыг шийдвэрлэх чиглэлээр олон санал хүсэлт ирсэн. Иргэд төрөөс бэлэн мөнгө, эд материал харахаас илүүтэйгээр бодлогын түвшний өөрчлөлт, хууль эрх зүйн шинэчлэлийг хүсэж байгаагаа илэрхийлсэн. Тухайлбал, аутизмын эмгэг болон нугасны гэмтэлтэй иргэдийн асуудлыг тусгайлан авч үзэж, хаврын чуулганаар холбогдох хууль тогтоомжид тусгахаар төлөвлөж байна.