🔴Б.Пүрэвдорж: Сонгуулиас өмнө сайдын суудалд суух гэсэн гишүүдийн шунал нь Засгийн газрын бүтцийг тэлэх эрсдэлтэй

Улс төрийн хүрээнд хамтарсан Засгийн газар байгуулах асуудал яригдаж байгаа энэ үед төрийн бүтцийг данхайлгахгүй байх нь нэн чухал болоод байна. Ялангуяа эрх мэдэлд тэмүүлсэн улс төрчдийн ашиг сонирхолд нийцүүлэн яамдын тоог нэмэгдүүлэхгүй байх, аль болох цомхон, чадварлаг бүтэцтэй ажиллах шаардлагатайг УИХ-ын гишүүн Б.Пүрэвдорж хэлэв. Өмнөх Засгийн газрын үед "Цэгцлэх хөдөлгөөн" өрнүүлсэн ч бодит үр дүнд хүрэлгүй хугацаа алдсан гашуун туршлага бий.

Шинэ Засгийн газрын бүрэлдэхүүний тухайд төрийн данхар бүтцийг цэгцлэх асуудлыг УИХ-ын индэр дээрээс удаа дараа хөндөж ирсэн хүмүүс манлайлж ажиллах хүлээлт байна. Тухайлбал, Н.Учрал сайдын хувьд төрийн албаны хүнд суртлыг багасгах, бүтцийг оновчтой болгох талаарх өөрийн байр сууриа ажил хэрэг болгоно гэж олон нийт найдаж байгаа юм.

Гэвч 2028 оны сонгуулиас өмнө амжиж сайдын суудалд очих гэсэн УИХ-ын гишүүдийн хувийн ашиг сонирхол, шунал нь Засгийн газрын бүтцийг тэлэх гол эрсдэл болж байна. Олон тооны яам шинээр байгуулж, эрх мэдлийг хуваарилах замаар улс төрийн тохироо хийх нь улс орны хөгжилд сөрөг нөлөөтэйг анхаарах хэрэгтэй юм. Төрийн албыг цомхон, үр ашигтай байлгах амлалт нь улс төрчдийн албан тушаалын шуналаас дээгүүр тавигдах ёстой гэлээ.