🔴П.Наранбаяр: Дараагийн Засгийн газрыг тогтвортой ажиллуулаасай

Засгийн газар бүрэн бүрэлдэхүүнээрээ огцорч байгаатай холбогдуулан УИХ-ын гишүүн П.Наранбаяр хоёр жилийн хугацаанд хийж хэрэгжүүлсэн ажлаа дүгнэж, цаг үеийн асуудлаар байр сууриа илэрхийллээ. Тэрээр хэлэхдээ, Ерөнхий сайд огцорсноор танхим бүхэлдээ үүрэгт ажлаа хүлээлгэн өгч байгаа нь улс төрийн соёл болон дэлхий нийтийн жишгийг дагаж буй хэрэг гэдгийг онцлов.

Боловсролын сайдын албыг хашсан хоёр жилийн хугацаанд боловсролын салбарт томоохон шинэчлэлүүдийг эхлүүлсэн. Тухайлбал, багш болон ажилтнуудын үндсэн цалинг 50 хувиар нэмэгдүүлж, салбарын хөрөнгө оруулалтыг хоёр дахин өсгөсөн. Мөн сургуулийн өмнөх болон бага боловсролын хөтөлбөрийг шинэчлэх зэрэг боловсролыг дэмжих жилийн хүрээнд олон ажлыг засгийн газраар батлуулан хэрэгжүүлсэн. Тэрээр дараагийн томилогдох сайдыг эхлүүлсэн ажлуудыг нь эрчимжүүлж, төрийн залгамж халааг хадгалж ажиллана гэдэгт найдаж байгаагаа илэрхийллээ.

Ерөнхий сайдыг огцруулах санал хураалтын үеэр эсрэг байр суурьтай байснаа тэрээр тайлбарлахдаа улс орны тогтвортой байдлыг нэн тэргүүнд тавьсан гэв. Олон улсын нөхцөл байдал, тэр дундаа Орос-Украины дайн болон Ойрхи Дорнодын хурцадмал байдал нь дэлхийн эдийн засаг, эрчим хүчний салбарт сөрөг нөлөө үзүүлж байгаа энэ үед Монгол Улс олон тулгуурт гадаад бодлогоо тууштай хадгалах шаардлагатайг тэмдэглэсэн юм.

Засгийн газар ойр ойрхон солигдох нь гадаадын хөрөнгө оруулагчдын итгэлийг алдагдуулж, томоохон хэлцлүүдийг зогсонги байдалд оруулдаг эрсдэлтэй. Ялангуяа олон улсын хөрөнгө оруулалтын сангууд хөрөнгөө татаж эхэлсэн нь эдийн засагт муу дохио болж байгаа тул шинээр байгуулагдах Засгийн газраас хурдтай бөгөөд тогтвортой ажиллагааг хүсэж байгаагаа илэрхийлэв.

Шинэ Засгийн газарт орж ажиллах эсэх нь намын удирдлагуудын шийдэх асуудал бөгөөд одоогоор хувийн зүгээс ямар нэгэн тайлбар өгөхөд бэлэн биш байна гэв.