🔴О.Цогтгэрэл: Ардчилсан нам Н.Учралын шинэ Засгийн газарт хамтрахгүй

Ардчилсан намын бүлгийн гишүүд чуулганы хуралдаанд оролцож эхэллээ. Энэхүү алхмыг тэд "бойкот" биш, харин парламентын ардчиллыг бэхжүүлэх, дархлааг нь хамгаалахын төлөөх зарчмын шаардлага байсан хэмээн тайлбарлаж байна. МАН-ын зүгээс АН-ын тавьсан шаардлагыг хүлээн авч, УИХ-ын дарга болон Ерөнхий сайдын томилгоотой холбоотой шийдлүүдийг гаргаж байгаа нь зөв алхам болсныг УИХ дахь АН-ын бүлгийн дарга О.Цогтгэрэл хэлэв.

Цаашид АН-ын бүлгээс өргөн барьсан хуулийн төслийг батлуулах нь нэн чухал байгааг санууллаа. Уг хуулийн гол агуулга нь 126 гишүүнтэй, таван нам, эвслээс бүрдсэн шинэ парламентад УИХ-ын дарга нь аль нэг нам, бүлгийн эрх ашгийг бус, нийтлэг ойлголцол, төв байр суурийг хангах ёстой гэсэн Үндсэн хуулийн үзэл санаанд тулгуурлаж байгаа юм.

Хамтарсан засгийн газарт орох эсэх асуудалд АН-ын зүгээс тодорхой байр суурьтай байна. Өмнөх туршлагаас харахад, улс орны эрх ашгийн төлөө хамтарч ажилласан ч МАН-ын Бага хурлын шийдвэрээр "хөөгдөж" гарсан гашуун түүх бий. Тиймээс улс төрийн хүчний хувьд дахин хамтарсан засагт орох нь зохисгүй бөгөөд олонх болсон нам үүргээ бие даан хүлээж, харин цөөнх хяналтаа тавих ёстой гэж үзэж байна.

Шинэ засгийн газрын бүтэц, бүрэлдэхүүний тухайд Н.Учрал даргын өмнө нь илэрхийлж байсан цомхон бүтэц, эдийн засгийн эрх чөлөөг дэмжих амлалтууд хэрхэн хэрэгжихийг анхааралтай ажиглахаа мэдэгдлээ. Хэрэв ам ажил зөрж эхэлбэл АН-ын бүлэг шаардлагаа үргэлжлүүлэн тавьж, хяналтын чиг үүргээ хэрэгжүүлнэ гэдгээ илэрхийлэв. Өмнөх засгийн газрын үйл ажиллагаа, бодлогын залгамж чанарыг хадгалах асуудал ч анхаарлын төвд байх болно гэдгийг илэрхийлэв.