🔴Ч.Лодойсамбуу: Шинэ Ерөнхий сайд Н.Учралын хувьд залуу, дэвшилтэт үзэл санаатай удирдагч байх хүлээлттэй байна

УИХ-ын гишүүн Ч.Лодойсамбуу өнгөрсөн хугацаанд эдийн засагт гарсан өсөлтийг Засгийн газрын ажлын үр дүн гэхээс илүүтэй дэлхийн зах зээл дээрх түүхий эдийн үнийн өсөлттэй холбон тайлбарлаж байна.

Нүүрс, зэс, алтны үнэ дэлхийн зах зээлд дээд цэгтээ хүрсэн нь төсвийн орлого, валютын нөөцийг нэмэгдүүлсэн боловч энэ өсөлт иргэдийн амьдралд үнийн хөөрөгдөл болон туссан. Олсон орлогоо зүгээр л халамж хэлбэрээр тараах бус, нэмүү өртөг шингэсэн үйлдвэрлэлийг дэмжиж, эдийн засгаа төрөлжүүлэхэд зарцуулаагүйг шүүмжлэв.

Шинэ Ерөнхий сайд Н.Учралын хувьд залуу, дэвшилтэт үзэл санаатай удирдагч байх хүлээлт нийгэмд байна. Тиймээс шинэ Засгийн газрын бүтэц маш цомхон, бүрэлдэхүүн нь цоо шинэ байх шаардлагатай. Ялангуяа өнөөдрийн үнийн өсөлт, инфляцын нөхцөл байдалд хариуцлага хүлээх ёстой Сангийн сайдаас эхлээд хуучин кабинетын гишүүдийг бүрэн чөлөөлж, шинэ багаар ажиллах нь зүйтэй гэж үзэж байна.

"Ажилтайгаа танилцах" нэрээр цаг алдаж, хуучин бодлогыг үргэлжлүүлэх нь залхуу хүмүүсийн тайлбар бөгөөд төрийн ажил сайдтай сайдгүй үргэлжлэх ёстой процесс юм. Шинэ Ерөнхий сайд нам доторх бүлгүүдийн ашиг сонирхлыг зохицуулах хүнд сорилттой тулгарах ч, зоригтой шинэчлэл хийж, буруу бодлогуудыг засах замаар эдийн засгийн бодит хөгжлийг авчрах хэрэгтэйг санууллаа.