Нүүр царай таних технологийн алдаанаас болж хилсээр хоригдсон эмэгтэй шүүхэд гомдол гаргалаа
АНУ-ын Теннесси мужийн Элизабеттон хотын оршин суугч, 50 настай Анжела Липпс нүүр царай таних технологийн алдаанаас болж зургаан сар орчим хугацаанд хилсээр хоригдсоныхоо төлөө Хойд Дакота мужийн Фарго хотын эрх баригчдыг шүүхэд өгөхөөр хууль ёсны бэлтгэлээ базааж эхэлжээ.
Гурван хүүхдийн ээж, таван ач зээгийн эмээ тэрээр өмнө нь хэзээ ч очиж үзээгүй Хойд Дакота мужид гарсан банкны луйврын хэрэгт хиймэл оюун ухааны тусламжтайгаар буруутай гэж тооцогдон, 2025 оны долдугаар сараас арванхоёрдугаар сар хүртэл саатуулагдсан байна.
Хэргийн эхлэл 2025 оны дөрөв, тавдугаар сард Хойд Дакота мужийн банкуудаас хуурамч цэргийн үнэмлэх ашиглан их хэмжээний бэлэн мөнгө авсан луйврын хэргээс үүдэлтэй юм. Фарго хотын мөрдөгчид хяналтын камерын бичлэгийг "Clearview AI" программ ашиглан шалгах явцад сэжигтний дүр төрхийг Анжела Липпсийн жолооны үнэмлэх болон олон нийтийн сүлжээний зурагтай таарч байна гэж үзжээ. Үүний үр дүнд 2025 оны долдугаар сарын 14-ний өдөр АНУ-ын Маршалын албаныхан Липпсийг гэртээ дөрвөн хүүхэдтэйгээ байх үед нь буу тулган баривчилсан байна.
Липпс Теннесси мужийн шоронд "оргодол" гэх ангиллаар 108 хоног батлан даалтгүй хоригдсоны эцэст аравдугаар сарын 30-нд Хойд Дакота руу хүргэгджээ. Энэ нь түүний амьдралдаа анх удаа онгоцоор ниссэн тохиолдол байв. Түүний өмгөөлөгч Жэй Гринвүүд банкны гүйлгээ, "Cash App" болон "Uber Eats" аппликейшны баримтуудыг шүүхэд танилцуулснаар Липпс гэмт хэрэг гарсан цаг хугацаанд Теннесси мужид байсныг хөдөлбөргүй нотолж чаджээ. Улмаар 2025 оны Зул сарын баярын өмнөх өдөр бүх хэргийг хэрэгсэхгүй болгож, түүнийг сулласан байна.
Хилсээр хоригдсон зургаан сарын хугацаанд Анжела Липпсийн амьдрал орвонгоороо эргэж, тэрээр орон гэр, автомашин, ажил болон хайртай нохойгоо алджээ. Шоронд байх хугацаандаа төлбөр тооцоогоо хийх боломжгүй байсан нь ийм хүнд нөхцөл байдалд хүргэсэн байна. Тэрээр хэвлэлд өгсөн ярилцлагадаа "Амьдралаа шинээр босгохыг хичээж байгаа ч тохиолдсон явдалд маш их гомдолтой, айдастай хэвээр байна" хэмээн өгүүлжээ.
Фарго хотын цагдаагийн дарга Дэйв Зиболски хиймэл оюун ухааны баталгаажаагүй мэдээлэлд хэт найдаж, нэмэлт шалгалт хийгээгүй нь алдаа байсныг хүлээн зөвшөөрсөн байна. Тус хэлтэс одоо уг программ хангамжийг ашиглахыг бүрмөсөн хориглоод байгаа ч хохирогчоос албан ёсоор уучлалт гуйгаагүй байна. Энэхүү хэрэг нь хууль сахиулах байгууллагууд технологийн дүгнэлтийг эцсийн нотлох баримт мэтээр үзэж, мөрдөн байцаалтын ажиллагааг дутуу дулимаг явуулдаг "мөрдөн байцаалтын инерци"-ийн аюултай жишээ болон АНУ даяар хэлэлцүүлэг өрнүүлж байна.
Одоогийн байдлаар Липпсийн өмгөөлөгчид түүний иргэний эрхийг зөрчсөн үндэслэлээр Фарго хотын захиргааны эсрэг нэхэмжлэл гаргахаар ажиллаж байна. Энэхүү шүүх хурал нь цаашид хууль хяналтын байгууллагууд хиймэл оюун ухааныг хэрхэн хариуцлагатай ашиглах, технологийн алдаанаас болж хохирсон иргэдийн эрх ашгийг хэрхэн хамгаалах тал дээр чухал жишиг тогтоох хүлээлттэй байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.