🔴Т.Аубакир: Сөрөг хүчний улс төрийн тоглолт Н.Учрал, Г.Занданшатар нарыг суудлаас нь хөдөлгөж чадлаа

ГБХНХ-ын сайд Т.Аубакир Ерөнхий сайд Г.Занданшатарыг үүрэгт ажлаасаа чөлөөлөгдөх хүсэлтээ гаргасантай холбогдуулан байр сууриа илэрхийллээ. Тэрбээр Монголын улс төрд 20 гаруй жил зүтгэсэн туршлагатай улс төрчийг шахалтад оруулж, албан тушаалаас нь буулгаж байгаад харамсаж буйгаа илэрхийлэв. Т.Аубакир сайд хэлэхдээ, "Гэмгүй хүмүүс нь ажлаа өгөөд, авлига албан тушаалын хэрэгт холбогдсон хүмүүс нь үлдэж байгаа нь улс төрийн дүр зураг ийм л байдаг юм болов уу гэх бодлыг төрүүлж байна. Сөрөг хүчин үүнийг ашигтайгаар эргүүлж, улс төр хийж байгаа байдал харагдлаа" хэмээн онцлов.

Ерөнхий сайд өөрийн хүсэлтээр чөлөөлөгдөх шийдвэрээ танхимынхаа гишүүдэд урьдчилан мэдэгдээгүй бөгөөд сайд нар энэ талаар өнөөдөр л мэдсэн байна. Хэдийгээр Үндсэн хуулиар олгогдсон бүрэн эрхийнхээ хүрээнд кабинетын сайд нараасаа асуулгүйгээр шийдвэр гаргах эрхтэй ч, Ерөнхий сайд огцроход Засгийн газар бүрэн бүрэлдэхүүнээрээ огцордог хуулийн зохицуулалттайг тэрбээр санууллаа. Намын удирдлагын түвшинд зөвшилцөл явагдсан байх магадлалтай ч жирийн гишүүд болон кабинетын сайд нартай энэ асуудлыг урьдчилж хэлэлцээгүйг тодотгов.

Мөн тэрбээр сөрөг хүчний зүгээс хийж буй улс төрийн тоглолтыг шүүмжилж, ямар нэгэн гэмт хэрэгт холбогдоогүй Н.Учрал, Г.Занданшатар нарыг суудлаас нь хөдөлгөж чадсаныг тэмдэглэв. Эдгээр хүмүүсийн эхлүүлсэн хүүхдийн эрх, хөдөлмөр эрхлэлтийг дэмжих болон "Рио Тинто"-той холбоотой томоохон ажлууд зогсох вий гэдэгт санаа зовж байгаагаа илэрхийлсэн юм. Түүнчлэн хэвлэл мэдээллийнхнийг үйл явдалд бодитой үнэлэлт дүгнэлт өгч, хар цагааныг ялгаж мэдээлэхийг уриаллаа.

Эцэст нь УИХ-ын чуулганы ирцийн асуудлыг хөндөж, өмнөх өдрүүдэд ирц бүрдэхгүй байсан атлаа өнөөдөр "өвчтэй" гэгдэж байсан гишүүд хүртэл бүрэн цуглаж, ирц бүрдсэнийг улс төрийн тохиролцоо байж болзошгүй хэмээн хардаж буйгаа нуусангүй. Тэрбээр "Монголын төр үүгээр зогсохгүй, цаашид тогтвортой байдал хангагдах байх гэж найдаж байна" хэмээн яриагаа өндөрлөв.