🔴 МАН-ын Удирдах зөвлөл хуралдаж эхэллээ

МАН-ын Удирдах зөвлөл өнөөдөр 14:30 цагт зарлагдсан хуралдаанаа эхлүүллээ. Хурлын өмнө Удирдах зөвлөлийн зарим гишүүд мэдээлэл өгөхдөө, өнөөдрийн хурлаар улс төрийн өнөөгийн нөхцөл байдал болон цаг үеийн тулгамдсан асуудлуудыг хэлэлцэх хүлээлттэй байгаагаа илэрхийлэв.

Олон нийтийн дунд яригдаж буй томилгоонууд, тухайлбал Н.Учрал даргыг Ерөнхий сайд болох, эсвэл Г.Занданшатар даргыг намын дарга болох гэж буй талаарх мэдээлэлд гишүүд "Одоогоор тийм мэдээлэл алга байна. Удирдах зөвлөлөөс ямар шийдвэр гарна, түүнийг л дагаж ажиллана" гэсэн тайлбарыг өглөө. Хурлын товыг хоёр цагийн өмнө авсан бөгөөд хэлэлцэх асуудлын дараалал хараахан тодорхой болоогүй байгаа аж.

Удирдах зөвлөлийн гишүүдийн зүгээс Засгийн газрын тогтвортой байдлыг хадгалах нь улс орны эрх ашигт нийцнэ гэсэн байр суурийг голчлон илэрхийлж байна. Дэлхий дахинд үүсээд буй дайн дажин, шатахууны үнийн өсөлт зэрэг хүндрэлтэй цаг үед шинэ сайд нар томилж, ажилтайгаа танилцах гэж цаг алдах нь эрсдэлтэй гэж үзэж байгаа юм. Тиймээс засаг тогтвортой байж, эдийн засаг болон геополитикийн асуудлуудад тууштай оролцох ёстойг онцоллоо.

Мөн Ардчилсан намын зүгээс УИХ-ын үйл ажиллагааг гацааж буйг шүүмжилж, улс эх орныг яаралтай хэвийн голдиролд нь оруулах шаардлагатайг дурдав. Намын дарга заавал Засгийн газрыг тэргүүлэх ёстой эсэх тухайд намын дүрэмд заалт бий ч, хууль эрх зүйн хүрээнд өөр зохицуулалтууд байдаг тул эцсийн шийдвэрийг хамтын зарчмаар гаргана гэдгээ мэдэгдлээ.

Гишүүд "Бид сандал ширээ, албан тушаалын хойноос хөөцөлдөх бус, ард иргэдийнхээ амьдралыг бодох цаг болсон. Улс орныг цэгцлэх ажлыг саад тотгоргүй явуулж, болохгүй байгаа зүйлтэйгээ тууштай тэмцэх хэрэгтэй" хэмээн байр сууриа нэгтгэж байна. Удирдах зөвлөлийн хуралдаанаас гарах шийдвэр нь Засгийн газрын цаашдын хувь заяа болон улс төрийн тогтвортой байдалд чухал нөлөө үзүүлэх юм.