🔴 Н.Наранбаатар: Удирдах зөвлөлийн улс төрийн шийдвэрийг 100 хувь дагаж мөрдөнө

УИХ-ын чуулганы үйл ажиллагаа хоёр долоо хоног гацаад буй энэ үед Төсвийн байнгын хорооны дарга Н.Наранбаатар цаг үеийн асуудлаар байр сууриа илэрхийллээ. Тэрбээр парламентын гацаанаас гарахын тулд намын Удирдах зөвлөлөөс гаргах улс төрийн шийдвэрийг хүлээж байгаагаа онцлов.

Тэрбээр хэлэхдээ, "Өчигдөр намын бүлэг хуралдаж, Удирдах зөвлөлийг хуралдуулан улс төрийн шийдвэр гаргах, тэрхүү шийдвэрийг гишүүд 100 хувь дагаж мөрдөхөөр тогтсон. Одоогоор хурлын тов гараагүй, хүлээлтийн байдалтай байна. Бүлгийн даргын зүгээс өнөөдөр хуралдах байх гэсэн мэдээлэл өгсөн ч одоогоор албан ёсны зар ирээгүй байна" гэв.

УИХ-ын дарга, намын дарга байж болох эсэх асуудалд Н.Наранбаатар гишүүн хувь хүнийхээ үүднээс байж болно гэсэн байр суурьтай байгаагаа илэрхийллээ. Тэрбээр "Хуулиар хориглоогүй учраас УИХ-ын дарга намын дарга байж болно гэж ойлгож байгаа. Өмнө нь ч дөрөв, таван намын дарга УИХ-ын даргын албыг хавсарч байсан туршлага бий. Намын дүрмийн хувьд ч сонгуульд намаа авч орж ялуулсан бол намын даргаар ажиллах боломжтой. Одоогийн байдлаар ямар нэгэн дүрмийн болон эрх зүйн зөрчил байхгүй" хэмээн тайлбарласан юм.

Мөн тэрбээр парламентын гацаанаас үүдэлтэй эдийн засгийн эрсдэлүүдэд санаа зовниж буйгаа илэрхийлэв. Төсвийн байнгын хороон дээр л гэхэд 10 гаруй тулгамдсан асуудал хуримтлагдаад байгааг тэрбээр онцоллоо. Дэлхий нийтийн эдийн засгийн нөхцөл байдал, шатахууны үнэ болон бараа бүтээгдэхүүний өсөлт зэрэг тулгамдсан асуудлуудыг шийдвэрлэхийн тулд УИХ яаралтай хуралдах шаардлагатай байгааг сануулав.

Н.Наранбаатар дарга "Бусад улс орнууд эдийн засгийн хямралт байдлаас сэргийлэх төлөвлөгөөгөө гаргаад хэрэгжүүлээд явж байна. Манайх шиг ингэж хоцорч байгаа улс орон байхгүй болов уу. Өнөөдөр эсвэл амралтын өдрүүдэд Удирдах зөвлөл хуралдаж, улс төрийн шийдвэрээ нэг тийш нь гаргах байх гэсэн хүлээлттэй байна. Ингэснээр ирэх долоо хоногоос төрийн үйл ажиллагаа хэвийн голдиролдоо орно гэж найдаж байна" гэлээ.