🔴 О.Цогтгэрэл: УИХ-ын үйл ажиллагааг Ардчилсан нам гацаагаагүй, гэхдээ хуралд суухгүй

Ардчилсан намын дарга О.Цогтгэрэл цаг үеийн асуудлаар мэдээлэл өгөхдөө шатахууны үнийн өөрчлөлт болон улс төрийн нөхцөл байдлын талаар байр сууриа илэрхийллээ. Тэрбээр шатахууны үнэ багагүй хэмжээгээр хөдлөх нөхцөл байдал үүсээд байгааг дурдаад, эрх баригч намын зүгээс гаргаж буй зарим шийдвэрүүд зарчимгүй байгааг шүүмжлэв.

УИХ-ын даргын албан тушаалыг намын даргатай хавсран гүйцэтгэж буй асуудалд О.Цогтгэрэл шүүмжлэлтэй хандаж байна. "Хуулиар хориглоогүй учраас болно гэдэг тайлбар бол зарчимгүй. Хуулиар хориглосон зүйлийг хийх боломжгүй нь ойлгомжтой, харин хуулиар хориглоогүй ч парламентат ёсны зарчимд нийцэхгүй байгаа буруу уламжлалыг засах ёстой" хэмээн тэрбээр онцоллоо. Мөн энэ асуудлаар өмнө нь тодорхой шаардлагуудыг албан бичгээр хүргүүлж байсныг сануулсан юм.

Засгийн газарт хамтрах болон албан тушаалын тохиролцоо хийсэн гэх асуудалд тэрбээр эрс няцаалт өглөө. Ардчилсан намын бүлэг 100 хувийн саналаар зарчмын байр сууриа нэгтгэсэн бөгөөд Үндсэн хуулийн дагуу олонх болсон нам нь Засгийн газраа бүрдүүлээд явах ёстой гэж үзэж байгаагаа илэрхийлэв. Түүнчлэн, түүнийг Ерөнхийлөгчийн сонгуульд нэр дэвших гэж буй тухай яриаг үндэслэлгүй гэдгийг мэдэгдлээ.

Намын дотоод сонгуулийн талаар ярихдаа, сүүлийн 14 хоногийн хугацаанд аймаг, сум, дүүргийн хэмжээнд олон үе шаттай сонгуулийг амжилттай зохион байгуулснаа дурдлаа. Хэдийгээр бүртгэл болон зарим техникийн асуудлаас үүдэлтэй гомдол санал гарсан ч, намын дотоод механизмаар эдгээр маргааныг шийдвэрлээд явж байгааг тэрбээр хэлэв.

Төрийн ажил гацсан хариуцлагыг Ардчилсан намд тохож буйг О.Цогтгэрэл эсэргүүцэв. Тэрбээр "Ардчилсан нам юуг ч гацаагаагүй. Эрх баригч эвсэл 80 гишүүнтэй байж яагаад ажлаа хийхгүй байгаа юм бэ? Харин ч та бүхэн биднээс биш, тэр хүмүүсээс ажлаа нэхэх хэрэгтэй. Хаягаа андуураад байх шиг байна" хэмээн байр сууриа хатуу илэрхийллээ.