🔴Ж.Батжаргал: УИХ-ын дарга Н.Учралыг чөлөөлөх талаар Удирдах зөвлөлд танилцуулна
МАН-ын бүлгийн хурлаар үүсээд буй дотоод маргаан зөрчлийг Удирдах Зөвлөл дээрээ ярилцах шаардлагатай гэдэг нэгдсэн шийдэлд хүрчээ. Төрийн ажлыг гацаах үндэслэлгүй гэж үзсэн бөгөөд бүлгийн зүгээс чиг үүргийнхээ дагуу хариуцлагатай ажиллахаар тогтсон байна.
Мөн Ардчилсан намаас тавьж буй шаардлага болон бүлгийн гишүүдээс гарсан саналуудыг намын Удирдах зөвлөлийн хурлаар ойрын хугацаанд буюу өнөөдөр, маргаашийн дотор хэлэлцэхээр боллоо. Удирдах зөвлөлөөс улс төрийн тодорхой шийдвэр гаргаж, УИХ дахь бүлэгтээ чиглэл өгснөөр уг шийдвэрийг бүрэн хэрэгжүүлж ажиллахаа илэрхийлэв.
Өнөөдрийн хуралд нийт 52 гишүүн оролцож, гаргасан шийдвэрийг 100 хувийн саналаар дэмжжээ. Хэдийгээр хурал хаалттай горимоор явагдсан ч улс үндэстний аюулгүй байдал, эдийн засгийн тогтвортой байдлыг хангах, иргэдийн аж амьдралд ирэх ачааллыг бууруулах нь гол зорилго гэдгийг тодотголоо.
Дэлхий нийтээр хямралын эсрэг төлөвлөгөө боловсруулан ажиллаж буй энэ үед Монгол Улс ч мөн адил төлөвлөлтөө нарийн хийж, улс төрийн түвшинд нэгдсэн ойлголцолд хүрэх нь зүйтэй гэж үзэж байна. Удирдах зөвлөлийн хурлын товыг намын Ерөнхий нарийн бичгийн дарга санал болгож товлох юм.
Сэтгэгдэл (1)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.