Жим Керригийн гадаад төрх болон орлон тоглогчийн тухай цуу яриа олны анхаарлыг татав
Холливудын нэрт жүжигчин Жим Керри 2026 оны хоёрдугаар сарын 26-ны өдөр Парис хотноо зохион байгуулагдсан "Сезар" кино наадмын үеэр хүндэт шагнал хүртэхдээ олныг гайхшруулсан төрхтэй ирсэн нь цахим орчинд томоохон маргаан дагуулаад байна.
Кино урлагт оруулсан хувь нэмрээ үнэлүүлж "Хүндэт Сезар" (Honorary César) шагнал гардан авсан 64 настай жүжигчин ёслолын ажиллагааны үеэр франц хэлээр илтгэл тавьсан боловч түүний өөрчлөгдсөн царай төрх нь "клон" буюу орлон тоглогч гэх цуу яриа гарахад хүргэжээ.
Жим Керри энэхүү нэр хүндтэй шагналыг гардан авахдаа хэдэн сарын турш бэлдсэн франц хэл дээрх илтгэлээ тавьж, үзэгчдийн талархлыг хүлээсэн юм. Гэвч түүний хэт толигор арьс, өөрчлөгдсөн нүүрний бүтэц нь шүтэн бишрэгчдийнх нь дунд эргэлзээ төрүүлж, түүнийг өөр хүнээр орлуулсан байж болзошгүй гэх таамгийг цахим орчинд хүчтэй өрнүүлэв. Үзэгчид түүнийг танихын аргагүй болсон хэмээн тодорхойлж байлаа.
Үүссэн нөхцөл байдалтай холбогдуулан гуравдугаар сарын 2-ны өдөр Жим Керригийн төлөөлөгчид болон "Сезар" наадмын ерөнхий төлөөлөгч Грегори Колье албан ёсны мэдэгдэл гаргаж, цуу яриаг няцаасан байна. Тэд жүжигчнийг өөрийн биеэр хүрэлцэн ирсэн бөгөөд хамтрагч, охин болон ач хүүгийнхээ хамт байсныг баталжээ. Мөн нүүр хувиргагч Алексис Стоун инстаграм хуудсаараа дамжуулан тус арга хэмжээний үеэр протез ашиглан жүжигчний төрхөд хувирсан гэдгээ мэдэгдсэн нь төөрөгдлийг улам нэмэгдүүлсэн хүчин зүйл болсон юм.
Энэхүү үйл явдал нь Холливудын эрэгтэй одуудын хөгшрөлтийн талаарх олон нийтийн хандлага өөрчлөгдөж буйн илрэл гэж шинжээчид үзэж байна. Өмнө нь зөвхөн эмэгтэй алдартнуудын гадаад төрх, гоо сайхны мэс заслыг шүүмжилдэг байсан бол одоо эрэгтэй одууд ч ижил түвшний "хяналт, шинжилгээнд" өртөх болжээ. Тухайлбал, Леонардо Ди Каприо Оскарын наадмын үеэр ердийнхөөсөө илүү туранхай, залуужсан харагдсан нь амьдралын хэв маягаа өөрчилсөн, эсвэл шинэ дүрдээ бэлдэж буйтай холбоотой гэх таамгийг мөн дагуулсан юм.
Олон улсын хэвлэл мэдээллийн хэрэгслүүдийн мэдээлж буйгаар, Холливудад эрэгтэйчүүдийн гоо сайхны мэс засал болон тарилгын үйлчилгээ авах хандлага эрс нэмэгдсэн байна. АНУ-д тарилгын эмчилгээ хийлгэгчдийн 6 хувийг, харин Их Британид гоо сайхны мэс засал хийлгэгчдийн 6.5 хувийг эрэгтэйчүүд бүрдүүлэх болсон нь хөгшрөлтийн давхар стандарт үгүй болж буйг харуулж байна.
Цаашид алдартнуудын гадаад төрхөд гарсан өөрчлөлт нь бишрэл гэхээсээ илүүтэйгээр нарийвчилсан шинжилгээ, хэлэлцүүлгийн сэдэв болон үлдэх төлөвтэй байна.
Эх сурвалж:
• elle.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.