Венесуэлийн удирдагч асан Николас Мадуро Нью-Йоркийн шүүхэд ирлээ
Венесуэлийн удирдагч асан Николас Мадуро болон түүний гэргий Силиа Флорес нар Манхэттэний холбооны шүүхэд хүрэлцэн ирж, шүүгч Алвин Хеллерштейний өмнө мэдүүлэг өгөхөөр боллоо.
АНУ-ын зэвсэгт хүчинд баривчлагдсанаас хойш Бруклин дахь Метрополитан хорих төвд (MDC) 82 хоногийг өнгөрүүлээд буй Мадурогийн хувьд энэ удаагийн шүүх хурал нь түүний хууль ёсны өмгөөлөл авах эрх болон санхүүжилтийн асуудлыг шийдвэрлэхэд чиглэж байна. АНУ-ын хориг арга хэмжээний улмаас түүний өмгөөлөгч Барри Поллак Венесуэлийн засгийн газраас төлбөрөө авч чадахгүй байгаа нь үндсэн хуулиар олгогдсон өмгөөлүүлэх эрхийг зөрчиж байна гэж өмгөөллийн баг үзэж байгаа юм.
Николас Мадурог баривчлах ажиллагаа 2026 оны нэгдүгээр сарын 3-ны өдөр "Operation Absolute Resolve" буюу "Тууштай шийдэмгий ажиллагаа" нэрээр Каракас хотод зохион байгуулагдсан юм. Энэхүү ажиллагаанд АНУ-ын Дельта хүчин болон Төв тагнуулын газрын (CIA) 150 орчим нисэх онгоц, нисдэг тэрэг, элит ангиуд оролцсон бөгөөд Мадурог баривчилсны дараа "USS Iwo Jima" хөлөг онгоцонд түр саатуулж, улмаар Нью-Йорк руу шилжүүлсэн байна. Түүнийг "Нарко-терроризмын хуйвалдаан", кокаин импортлох хуйвалдаан болон хууль бус зэвсгийн хэрэгт буруутгаж байгаа бөгөөд АНУ-ын Хууль зүйн яамнаас түүнийг "Cartel de los Soles" бүлэглэлийг удирдаж, АНУ-ыг хар тамхиар хангаж байсан гэж үзэж байна.
Бруклин дахь Метрополитан хорих төвийн нөхцөл байдал маш хүнд байгааг эх сурвалжууд онцолж байна. Мадуро өдөрт 23 цагийг тусгаарлах өрөөнд өнгөрүүлж байгаа бөгөөд интернэт болон сонин хэвлэл ашиглах боломжгүй байгаа юм. Түүний хүү Николас Мадуро Гуэррагийн хэлснээр, эцэг нь өдөр бүр дасгал хөдөлгөөн хийж, сэтгэл санааны хувьд хүчтэй байгаа бөгөөд ихэнх цагаа Библи уншихад зарцуулж байгаа аж. Тэрээр гэр бүл болон өмгөөлөгчтэйгээ ердөө 15 минутын утсаар ярих эрхтэй бөгөөд хорих ангийн бусад хоригдлууд түүнийг "Ерөнхийлөгч" хэмээн дууддаг байна.
Гэсэн хэдий ч тус хорих анги нь эрүүл ахуйн шаардлага хангаагүй хоол хүнс, эмнэлгийн тусламж үйлчилгээний дутагдал, байнгын хөл хорио зэргээрээ алдартай "там" мэт газар гэж тодорхойлогддог. Мадуро одоогоор Шон "Дидди" Комбс, Сэм Бэнкман-Фрид зэрэг олны танил хүмүүстэй нэг дор хоригдож байгаа юм. Венесуэлийн дотоод улс төрийн нөхцөл байдлын хувьд Мадурог баривчлагдсаны дараа дэд ерөнхийлөгч Делси Родригес ерөнхийлөгчийн үүргийг түр орлон гүйцэтгэгчээр томилогдсон байна.
Венесуэлийн засгийн газар энэхүү ажиллагааг "хүн хулгайлах" болон "үндэсний бүрэн эрхт байдалд халдсан хэрэг" гэж албан ёсоор буруушааж байгаа бол сөрөг хүчний удирдагч Мария Корина Мачадо үүнийг хууль ёсны ялалт хэмээн тэмдэглэж байна.
АНУ-ын засаг захиргаа шилжилтийн үед Венесуэлийн газрын тосны салбарыг удирдах сонирхолтой байгаагаа илэрхийлсэн ч урт хугацааны засаглалын төлөвлөгөө хараахан тодорхой болоогүй байна. Энэхүү шүүх үйл явц нь олон улсын харилцаа болон Латин Америкийн улс төрд томоохон өөрчлөлт авчрах хүлээлттэй байна.
Эх сурвалж:
• wypr.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.