ШУУРХАЙ: Өмнөд Солонгос эрчим хүчний хямралын улмаас улс даяар онцгой дэглэм тогтоолоо
Бүгд Найрамдах Солонгос Улсын Ерөнхийлөгч И Жэ Мён 2026 оны гуравдугаар сарын 24-ний өдөр Ойрхи Дорнодод үүсээд буй дайны нөхцөл байдлаас шалтгаалан эрчим хүчний хангамж тасалдаж байгаатай холбогдуулан улс даяар эрчим хүч хэмнэх аян болон "яаралтай тусламжийн тогтолцоо" хэрэгжүүлэхийг уриаллаа.
Засгийн газраас иргэд болон аж ахуйн нэгжүүдэд зориулсан эрчим хүч хэмнэх 12 тодорхой удирдамжийг танилцуулсан бөгөөд дөрөвдүгээр сарын сүүл гэхэд эрчим хүчний бүрэн хэмжээний хямралд орохоос сэргийлэхийг зорьж байна.
Иргэдийг шүршүүрт орох хугацаагаа богиносгох, гар утас болон цахилгаан автомашиныг зөвхөн өдрийн цагаар цэнэглэх, угаалгын машин болон тоос сорогчийг амралтын өдрүүдэд ашиглахыг зөвлөв
Мөн гуравдугаар сарын 25-ны шөнө дундаас эхлэн төрийн байгууллагуудад автомашины дугаарын хязгаарлалт бүхий таван өдрийн сэлгэн явах системийг заавал мөрдүүлэхээр болжээ.
Холбогдох албаныхан шингэрүүлсэн байгалийн хийн (LNG) хамаарлыг бууруулахын тулд эрчим хүчний бодлогодоо өөрчлөлт оруулж байна. Сөүл хот ирэх тавдугаар сар гэхэд таван цөмийн реакторыг дахин ажиллуулж, нүүрсний цахилгаан станцуудын хязгаарлалтыг сулруулахаар төлөвлөж байгаа юм. Ашиглалтаас гаргахаар төлөвлөж байсан гурван нүүрсний станцын ажиллах хугацааг сунгаснаар өдөрт 14,000 тонн буюу улсын дундаж хэрэглээний 20 орчим хувьтай тэнцэх LNG-г хэмнэх боломжтой гэж үзэж байна.
Одоогийн хямрал нь Иран болон АНУ, Израилийн хооронд үүссэн дайны улмаас Ормузын хоолойгоор дамжих тээвэрлэлт зогссонтой шууд холбоотой юм. Өмнөд Солонгос улс түүхий тосныхоо 70 орчим хувийг энэ замаар импортолдог тул Ерөнхийлөгч И Жэ Мён эмзэг бүлгийн өрхүүд болон жижиг бизнесүүдийг дэмжих зорилгоор 25 их наяд воны (16.6 тэрбум ам.доллар) "дайны үеийн" нэмэлт төсвийг яаралтай батлахыг уриаллаа. Ерөнхий сайд Ким Мин Сок дотоодын эдийн засгийн тогтвортой байдалд анхаарал хандуулахын тулд БНХАУ-д хийх айлчлалаа цуцалсан байна.
Тус улс одоогоор 190 сая баррель газрын тосны нөөцтэй байгаа нь 60-70 хоногийн хэрэглээг хангах боломжтой ч Ойрхи Дорнодоос импорт хийхгүй бол нефть химийн экспортын салбарын хэрэгцээг тооцвол энэ нөөц хоёр сар хүрэхгүй хугацаанд дуусах эрсдэлтэйг шинжээчид анхааруулж байна. Үүний зэрэгцээ прокурорын байгууллагаас шатахуун түгээх компаниудыг үгсэн хуйвалдаж, үнэ хөөрөгдсөн байж болзошгүй гэх үндэслэлээр шалгаж эхэлжээ.
Засгийн газраас гуравдугаар сарын 13-нд нэвтрүүлсэн түлшний үнийн дээд хязгаарыг хэвээр хадгалж байгаа бөгөөд энэ сарын 27-нд үнийн хоёр дахь шатны зохицуулалтыг хийхээр төлөвлөж байна. Хэрэв эрчим хүчний түгшүүрийн түвшин "анхааруулах" зэрэглэлд хүрвэл хувийн хэвшлийнхэнд автомашины дугаарын хязгаарлалтыг заавал мөрдүүлэх зэрэг илүү хатуу арга хэмжээ авч магадгүй байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.