Жирэмсэн хамтран амьдрагчаа хөнөөсөн ютүбэр залуу бүх насаараа хоригдох ял сонслоо
Хойд Ирландын Белфаст хотын эрүүгийн шүүхээс 36 настай Стивен Маккаллаг өөрийн жирэмсэн хамтран амьдрагч Натали Макналлигийн амийг онц хэрцгийгээр хөнөөсөн хэрэгт гэм буруутай гэж үзэн, бүх насаар нь хорих ял оноолоо.
2026 оны 3-р сарын 23-ны өдөр зургаан эрэгтэй, зургаан эмэгтэйгээс бүрдсэн шүүх бүрэлдэхүүн хоёр цаг гаруй зөвлөлдсөний эцэст санал нэгтэйгээр ийм шийдвэр гаргасан байна. Шүүгч Кинни ялын тогтоолыг уншиж танилцуулахад ялтан ямар нэгэн сэтгэл хөдлөл үзүүлээгүй бөгөөд түүний суллагдах эрхгүйгээр эдлэх ялын доод хэмжээг тогтоох шүүх хурал ирэх тавдугаар сарын 15-нд болохоор товлогджээ.
Хэргийн тухайд, 32 настай Натали Макналли 2022 оны 12-р сарын 18-ны өдөр Лурган дахь гэртээ халдлагад өртөж, амь насаа алдсан юм. Тухайн үед тэрээр 15 долоо хоногтой жирэмсэн байсан бөгөөд хосууд хүүдээ Дин гэх нэр өгөхөөр төлөвлөөд байжээ. Шүүх эмнэлгийн дүгнэлтээр хохирогч олон удаа хутгалуулж, боомилуулснаас гадна биедээ хүнд гэмтэл авсан нь тогтоогдсон байна.
Хэрэгтэн Стивен Маккалла нь "VoteSaxon07" нэрээр ютүб суваг ажиллуулдаг байсан бөгөөд хэрэг гарсан шөнө өөрийгөө гэртээ байсан мэтээр харуулахын тулд "Grand Theft Auto" (GTA) тоглоомын шууд дамжуулалтыг зургаан цагийн турш зохион байгуулсан байна. Тэрээр үзэгчидтэй харилцахгүй байгаагаа "техникийн саатал" хэмээн тайлбарлаж байсан ч кибер шинжээчид уг бичлэгийг хэрэг гарахаас дөрөв хоногийн өмнө урьдчилан бэлтгэсэн болохыг илрүүлжээ.
Хэдийгээр тэрээр хуурамч нотлох баримт бүрдүүлсэн ч хяналтын камерын бичлэгүүд түүнийг хэрэг гарсан шөнө Лисбурнаас Лурган руу автобусаар зорчиж, дараа нь таксигаар буцсаныг нь баримтжуулж чадсан юм. Мөрдөн байцаалтын явцад Маккалла хэрэг үйлдсэнийхээ дараа хохирогчийн гэр бүлийнхнийг тагнаж, утсаа тэдний гэрт нууцаар үлдээн яриаг нь бичиж авдаг байсан нь илэрчээ. Мөн тэрээр Наталигийн утсанд зөвшөөрөлгүй нэвтэрч, бусадтай харилцсан зурвасыг нь уншсаны улмаас хар нь хөдөлж, ийм хэрэг үйлдсэн байж болзошгүйг прокурорууд онцолсон байна.
Шүүхийн шийдвэр гарсны дараа Наталигийн ах дүүс түүнийг бусдад үлгэр дуурайлал болсон гайхалтай хүн байсныг дурсаад, шударга ёс тогтсонд баяртай байгаагаа илэрхийлэв. Хэдийгээр гэмт хэрэгтэн зохих ялаа авсан ч эмэгтэйчүүдийн эсрэг хүчирхийллийн золиос болсон олон гэр бүлд энэ хэрэг маш том сургамж, сануулга болж үлдэж байгааг тэд онцолсон юм.
Эх сурвалж:
• gript.ie
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.