Хурдны замын хувь тавилан хаашаа эргэх вэ

Туулын хурдны зам төсөл эхлэхтэй зэрэгцээд нийгмийн сүлжээнд иргэд замын трасс, чиглэлийн талаар идэвхтэй хэлэлцүүлэг өрнүүлж байна. Зарим нь Улаанбаатар хотын газрын зураг дээр өөрсдийн хувилбарыг зурж, түгжрэлийг шийдэх гарц хайж байгаа бол зарим нь хиймэл оюун ухаан (AI) ашиглан Туул гол дээгүүрх замын төсөөллийг гаргаж, олон нийтийн анхаарлыг татаж байна.

Ажил хэрэгч саналууд ба хувилбарууд

Шүүмжлэл, хэлэлцүүлэг дундаас хэд хэдэн ажил хэрэгч аргументууд гарч байгааг нийтлэлч Б.Олзвой онцоллоо. Үүнд:

• Хурдны замыг хотын хойд хэсгийн гэр хороолол дундуур явуулах;
• Богд уулын урдуур тавих;
• Улаанбаатар төмөр замын (УБТЗ) трассыг ашиглаж, төмөр замыг хотоос гаргах зэрэг саналууд багтаж байна.

Хоёр транзит коридор ба түгжрэлийн шийдэл

Хотын даргын мэдэгдсэнээр, ирэх дөрөвдүгээр сард Улаанбаатар хотын хойд талаар явах 1-р тойрог хурдны замын тендер зарлагдах бөгөөд энэ нь Туулын хурдны замтай огтолцох юм. Улаанбаатар хотын түгжрэлийн гол шалтгаан нь зүүн-баруун чиглэлийн урсгал хотын төвөөр дайран өнгөрдөгт оршдог. Хэрэв хотын урд болон хойд хэсэгт хоёр транзит коридор бий болбол түгжрэл 40-50 хувиар буурах боломжтой гэж үзэж байна.

Бодит жишээ: 120 минутын замыг 20 минутад

Төслийн үр ашгийг бодит амьдрал дээр буулгаж үзвэл, Баянзүрх дүүргээс 1-р хороолол хүртэл төв замаар явахад түгжрэл, гэрлэн дохионоос шалтгаалан 90-120 минут зарцуулдаг. Харин хурдны замаар Маршалын гүүрнээс Сонсголон хүртэл явахад ердөө 15-20 минут зарцуулах тооцоолол гарч байна.

Бусад хувилбаруудын сул тал

Богд уулын урдуур зам тавих санал нь хотын замын ачааллыг бууруулахад нөлөө үзүүлэхгүй бөгөөд эдийн засгийн хувьд үр ашиггүй төсөл болох эрсдэлтэй. Мөн төмөр замын трассыг ашиглах хувилбар нь ОХУ-аас зөвшөөрөл авах шаардлагатай тул хэрэгжих магадлал бага юм.

Мэргэжлийн байгууллагын дүгнэлтээр "Туулын хурдны зам төсөл нь техникийн хувьд хэрэгжих нөхцөл бүрдсэн, нийгэм-эдийн засгийн ач холбогдолтой, байгаль орчинд сөрөг нөлөөлөл багатай" гэж тодорхойлогджээ. Хотын оршин суугчдын хувьд энэхүү томоохон бүтээн байгуулалтыг улс төржилтөөс ангид, бодит ажил хэрэг болоосой гэсэн хүлээлттэй байна.

Нийтлэлч: Б.Олзвой