Улсын өсөх идэр начин Чулуунбаатарын Батчулуун таалал төгсчээ

Төв аймгийн Баяндэлгэр сумын харьяат, үндэсний бөхийн нэрт төлөөлөл, Улсын өсөх идэр начин Чулуунбаатарын Батчулуун 2026 оны гуравдугаар сарын 22-ны өдөр таалал төгсөж, спортын салбарт нөхөж баршгүй гарз тохиолоо.

1981 онд төрсөн тэрбээр амьдралынхаа туршид үндэсний спортыг хөгжүүлэх, залуу хойч үедээ өвлүүлэн үлдээх үйлсэд үнэтэй хувь нэмэр оруулсан хүчтэн байв.

Тэрээр Ардын хувьсгалын 93 жилийн ойн баяр наадмаар хүчит 512 бөхийн барилдаанд тав давж, Улсын заан Б.Сайнбаяраар начин цолны болзол хангаж байсан түүхтэй. Энэхүү амжилт нь түүний олон жилийн хөдөлмөр, хичээл зүтгэлийн үр дүн байсан бөгөөд бөхийн хүрээнийхэн түүнийг тууштай, дайчин барилдаантай хэмээн үнэлдэг байлаа.

Үүнээс гурван жилийн дараа буюу Ардын хувьсгалын 96 жилийн ойн баяр наадмын тавын даваанд Улсын гарьд Б.Гончигдамбыг өвдөг шороодуулснаар цолоо баталж, "Өсөх идэр" чимэг хүртсэн юм. Тэрээр зөвхөн улсын наадамд бус, орон нутгийн чанартай барилдаануудад ч амжилттай оролцож байсан бөгөөд Дорноговь аймгийн баяр наадамд үзүүрлэж, Аймгийн заан цол хүртэж байсан чансаатай бөхчүүдийн нэг байв.

Түүний спортын замнал, гаргасан амжилтууд үндэсний бөхийн түүхэнд тодоор бичигдэн үлдэх бөгөөд түүний гэгээн дурсгал бөх сонирхогчдын зүрх сэтгэлд үүрд хадгалагдах болно.

Улсын өсөх идэр начин Ч.Батчулууны гэр бүл, төрөл төрөгсдөд гүн эмгэнэл илэрхийлье.