Оросын төмөр зам компани санхүүгийн хямралын улмаас олон мянган ажилтнаа цомхотгож байна
"Оросын төмөр зам" (РЖД) төрийн өмчит компани санхүүгийн гүнзгий хямралд орж, зардлаа танах зорилгоор захиргааны болон удирдлагын түвшний 6000 орчим ажилтнаа цомхотгохоор болжээ.
Тус компанийн гүйцэтгэх захирал Олег Белозеров 2026 оны 3 дугаар сарын 18-ны өдөр хийсэн мэдэгдэлдээ төв аппаратын ажилтнуудын 15 хувийг чөлөөлөх шийдвэр гаргаснаа баталсан юм. Энэхүү бүтцийн өөрчлөлт нь 2026 онд багтан компанийн төсвөөс 74 тэрбум рублийн хэмнэлт гаргах стратегийн төлөвлөгөөний нэг хэсэг болж байна.
Санхүүгийн нөхцөл байдал ийнхүү эрс муудсан нь 2025 онд тус компани 4.4 тэрбум рублийн цэвэр алдагдал хүлээсэнтэй шууд холбоотой юм. Энэ нь 2020 оноос хойш тохиолдож буй анхны алдагдал бөгөөд өмнөх онд 44 тэрбум рублийн ашигтай ажиллаж байсан үзүүлэлтээс эрс уруудсан хэрэг боллоо. Түүнчлэн компанийн нийт өр 50 тэрбум ам.доллар буюу 4 их наяд рубльд хүрч, зээлийн хүүгийн зардал нь 2025 оны сүүл гэхэд хоёр дахин нэмэгдэж 332 тэрбум рубль болсон нь санхүүгийн гүн хямралд хүргэжээ.
Ачаа тээврийн хэмжээ 2025 оны эцэс гэхэд 1.1 тэрбум тонн болж буурсан нь 2009 оноос хойших хамгийн доод үзүүлэлт болж бүртгэгдсэн байна. Тээвэрлэлтийн уналт 2026 оны эхээр ч үргэлжилж, 2 дугаар сард өмнөх оны мөн үетэй харьцуулахад 3.2 хувиар буурчээ. Ялангуяа нүүрс болон металлургийн бүтээгдэхүүний дотоодын эрэлт багассан, мөн барууны зах зээлүүд хаагдсан нь тээврийн орлогод хүчтэй цохилт болсон гэж шинжээчид үзэж байна.
Хямралыг даван туулахын тулд РЖД компани үл хөдлөх хөрөнгө болон охин компаниудынхаа хувьцааг худалдаж эхэллээ. Үүнд Москва дахь Рижский төмөр замын буудал, Лихоборы депо, "Москва Сити" дүүрэг дэх "Moscow Towers" цамхгийн эзэмших хувь зэрэг томоохон объектууд багтаж байна. Мөн Холбооны ачаа тээврийн компанийн (ФГК) 49 хувийг 44 тэрбум рублиэр худалдахаар төлөвлөж байгаа бөгөөд 2026 оны хөрөнгө оруулалтын хөтөлбөрөө 25 хувиар танаж, 713.6 тэрбум рубль болгон бууруулжээ.
ОХУ-ын засгийн газраас тус компанид 200 тэрбум рублийн шууд дэмжлэг хүссэн боловч төсвөөс ердөө 65 тэрбум рубль хуваарилж, оронд нь 1.3 их наяд рублийн өрийн бүтцийг өөрчлөх багц төлөвлөгөөг баталсан байна. Нэмэлт орлого бүрдүүлэхийн тулд 2026 оны 3 дугаар сараас эхлэн ачаа тээврийн тарифыг төлөвлөгөөт бусаар 1 хувиар нэмэгдүүлсэн нь 22.3 тэрбум рублийн ашиг авчирна гэж тооцоолж байгаа ч компанийн ирээдүйн төлөв байдал эгзэгтэй хэвээр байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.