Афганистаны хилийн мөргөлдөөний улмаас 160 мянган иргэн хүнсний тусламжгүй хоцорчээ
НҮБ-ын Дэлхийн хүнсний хөтөлбөр (WFP) Афганистаны хилийн бүс нутгуудад үүссэн зэвсэгт мөргөлдөөний улмаас яаралтай хүнс түгээх ажиллагаагаа түр зогсоосноор 160,000 гаруй иргэн тусламж авч чадахгүй хүнд нөхцөлд ороод байна. 2026 оны хоёрдугаар сарын сүүлээс эхлэн Талибан болон Пакистаны зэвсэгт хүчний хооронд Дюрандын шугамын дагуух хилийн маргаан ширүүссэн нь хүмүүнлэгийн цуваа явах боломжийг хаажээ.
Хилийн маргаан даамжирч, хоёр тал агаараас болон газраар цохилт өгч эхэлсэн нь тусламжийн байгууллагуудын үйл ажиллагаанд шууд саад учруулж байна. Одоогийн байдлаар Нангархар, Кунар, Лагман, Пактика, Пактия, Хост, Кандагар, Гильменд, Забуль зэрэг мужуудын 30-аас 46 орчим дүүрэгт байлдааны ажиллагаа идэвхтэй явагдаж байгаа юм. Энэхүү аюултай нөхцөл байдлын улмаас сүүлийн нэг долоо хоногийн хугацаанд хилийн бүс нутгаас 20,000 орчим өрх гэр бүл орон гэрээ орхин дүрвэхэд хүрээд байна.
Тусламж зогссон бүс нутгийн иргэдийн талаас илүү хувь нь хэдийнэ "өлсгөлөнгийн онц байдал"-ын түвшинд хүрээд байсан бөгөөд дөрвөн мужид хүүхдийн хоол тэжээлийн дутагдал нэн аюултай хэмжээнд хүрчээ. Эдгээр бүс нутгийн оршин суугчид 2025 оны наймдугаар сарын 31-нд болсон хүчтэй газар хөдлөлтөд нэрвэгдэж, дөнгөж сэргээн босголт хийж байсан юм. Гэвч ийнхүү дайн болон өлсгөлөнгийн давхар цохилтод дахин өртөж, амьд үлдэх баталгаагүй нөхцөлд ороод байна.
НҮБ-ын мэдээлснээр 2026 онд Афганистаны нийт хүн амын гуравны нэг буюу 17.4 сая хүн хүнсний тусламж зайлшгүй шаардлагатай байгаагаас 3.7 сая нь хурц тэжээлийн дутагдалд орсон хүүхдүүд байна. Хүмүүнлэгийн үйл ажиллагааг хэвийн үргэлжлүүлэхэд ойрын зургаан сарын хугацаанд 313 сая ам.долларын санхүүжилт нэн шаардлагатай байгааг олон улсын байгууллагууд анхаарууллаа.
Хэрэв санхүүжилтийн асуудал ойрын хугацаанд шийдэгдэхгүй бол 2026 оны дөрөвдүгээр сар гэхэд яаралтай хүнс түгээх нөөц бүрэн дуусах эрсдэлтэй байна. Энэ нь Афганистаны хэмжээнд хүмүүнлэгийн гамшгийг улам даамжруулж, олон мянган хүний амь насанд аюул учруулах бодит аюул болоод байгааг Дэлхийн хүнсний хөтөлбөрийн албан ёсны тайланд онцолжээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.