Дэлхий даяар Цусан сар буюу сар бүрэн хиртэх ховор үзэгдэл тохиож байна
2026 оны анхны бөгөөд 2028 он хүртэлх сүүлчийн сар бүрэн хиртэх үзэгдэл өнөөдөр тохиож, дэлхийн олон бүс нутгийн оршин суугчид "Цусан сар"-ыг ажиглах боломжтой боллоо. Нийт 5 цаг 39 минут үргэлжлэх энэхүү байгалийн ховор үзэгдлийн үеэр сар дэлхийн сүүдэрт бүрэн орж, 58 минутын турш зэс улаан өнгөтэй харагдах юм. Уг үзэгдэл нь Хойд болон Өмнөд Америк, Зүүн Ази, Австрали, Энэтхэг зэрэг орнуудад харагдаж байгаа бөгөөд одон орон сонирхогчдын анхаарлыг ихээр татаж байна.
Хиртэлтийн үйл явц UTC цагаар 08:44-д эхэлж, сар дэлхийн сүүдэрт бага багаар орсоор 11:04 цагт бүрэн хиртэлтийн шатандаа шилжсэн байна. Энэ үед сар хамгийн тод улаан өнгөтэй болох бөгөөд оргил үе нь 11:33 цагт тохиож байгаа юм. Сарны бүрэн хиртэлт 12:03 цаг хүртэл үргэлжлээд, улмаар хэсэгчилсэн хиртэлтийн шатанд шилжиж, 14:23 цаг гэхэд бүрэн дуусах хуваарьтай байна.
Бүс нутгаар авч үзвэл, Хойд Америкийн оршин суугчид үүр цайхаас өмнө сар хиртэлтийг харж байгаа бол Зүүн Ази болон Австралид сар мандах үед буюу оройн цагаар үзэгдэж байна. Тухайлбал, Токио хотод оройн 17:44 цагаас эхлэн шөнө дунд хүртэл үргэлжлэх бол Энэтхэгт сар мандахтай зэрэгцэн 15:20-18:47 цагийн хооронд харагдаж, 18:33-18:40 цагийн хооронд хамгийн тод ажиглагдах юм. Харин Африк болон Европын орнуудад энэ удаагийн хиртэлт ажиглагдахгүй.
"Цусан сар" гэж нэрлэгддэг энэхүү үзэгдэл нь дэлхийн агаар мандал нарны гэрлийн богино долгионыг сарниулж, урт долгионыг сар руу хугалан тусгаснаас үүддэг байна. Энэ жилийн хиртэлт нь Энэтхэгийн "Холи" баяр болон "Өтөн сар" (Worm Moon) хэмээх тэргэл сартай давхцаж байгаагаараа онцлогтой. Үүнтэй холбоотойгоор Энэтхэгийн Аёдхья, Тирумала зэрэг газруудын сүм хийдүүд уламжлалт зан үйлийн дагуу үүдээ эрт хаажээ.
Одон орон сонирхогчдод зориулж хэлэхэд, сар бүрэн хиртэх үед тэнгэрт Бархасбадь гараг сарны ойролцоо тод харагдах боломжтой байна. Сарны хиртэлтийг нарны хиртэлтээс ялгаатай нь энгийн нүдээр болон дурангаар аюулгүй харах боломжтой бөгөөд үзэгдэх боломжгүй бүс нутгийнханд зориулж НАСА (NASA) зэрэг байгууллагууд цахим орчинд шууд дамжуулалт хийж байна.
2026 онд нийт хоёр удаа сар хиртэх бөгөөд дараагийнх нь наймдугаар сарын 28-нд хэсэгчилсэн байдлаар тохионо. Харин дараагийн бүрэн хиртэлт буюу "Цусан сар" 2028 оны 12 дугаар сарын 31-нийг хүртэл дахин давтагдахгүй тул энэ удаагийн үзэгдэл нь шинжлэх ухаан болон танин мэдэхүйн өндөр ач холбогдолтой юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.