🔴Хөдөлмөрийн баатар Д.Сэрээтэр: Тамирчид маань уйгагүй зүтгээрэй. Зүтгэж явсан цагт хүний хүссэн хүсэл биелдэг юм шүү

Ерөнхийлөгч У.Хүрэлсүх төрийн дээд цол, одон, медаль гардууллаа. Төрийн дээд цол, одон медалиар энгэрээ мялаасан эрхмүүдийн сэтгэгдлийг хүргэж байна. 

-Өмнөговь аймгийн Манлай сумын Өгөөмөр багийн малчин Б.Бямбажав гуай 50 гаруй жил тэмээ маллаж, говь нутгийнхаа хөгжилд үнэтэй хувь нэмэр оруулж яваа нэгэн. Тэрбээр төрийн эрхэм цол хүртсэндээ баяртай байгаагаа илэрхийлж, "Тэмээ бол ашиг шим өндөртэй, хариулга маллагаа их шаарддаггүй сайхан мал. Цаг агаар сайхан байвал малчин хүний жаргал тэр юм" хэмээн хуваалцлаа.

-Монголын радиогийн "Алтан микрофон"-ны эзэн, бөхийн тайлбарлагч 30 гаруй жилийн хөдөлмөрөө үнэлүүлж, төрийн дээд шагнал хүртлээ. Ардын хувьсгалын 70 жилийн ойгоос эхлэн бөхийн тайлбар хийж ирсэн тэрбээр өөрийн багш нар болох МУСГЗ С.Бүргэд, П.Цагаан нартаа талархал илэрхийлсэн юм. Тэрбээр "Төрийн тэргүүнээс шагнал гардан авахдаа туйлын их баярлалаа. Ардын хувьсгалын 100, 101 жилийн ойн баяр наадмын хүчит бөхийн барилдааныг тайлбарлаж байсан минь сэтгэлд тод үлджээ" хэмээн дурслаа.

-Чөлөөт бөхийн 74 кг-ын жинд эх орныхоо нэрийг гаргаж явсан Ардын багш, Гавьяат тамирчин Д.Сэрээтэр Монгол Улсын "Хөдөлмөрийн баатар" цол хүртлээ. Тэрбээр өөрийн өрсөлдөгч нар болон хамт бэлтгэл хийж байсан нөхдөдөө талархаж, тамирчин хүн тууштай зүтгэвэл хүссэн хүсэл нь биелдэг гэдгийг залуучуудад захилаа. Мөн үндэсний болон чөлөөт бөхийн олон шилдэг тамирчдыг бэлтгэн гаргаснаараа бахархаж буйгаа онцлов.

-Үндэсний өв соёлыг 25 жилийн турш сурталчлан таниулж буй уран бүтээлч МУГЖ цол хүртлээ. Монголын хүүхдийн ордонд уртын болон ардын дууны багшаар ажилладаг тэрбээр ирэх дөрөвдүгээр сард өөрийн нэрэмжит өсвөрийн дуулаачдын олон улсын уралдааныг зохион байгуулахаар төлөвлөж байна. Тэрбээр "Ардын дуу бол бидний дархлаа, өв соёл юм. Энэхүү баярт мөчид ээжийгээ болон хамт олон, нутгийн зон олондоо чин сэтгэлээсээ талархаж байна" гэсэн юм.

-Нийслэлийн Хан-Уул дүүргийн 63 дугаар сургуулийн ахлах тогооч Н.Сэлэнгэ 50 гаруй жил тогооч мэргэжлээрээ тууштай ажиллаж, төрийн одон медалиар шагнагдлаа. Тэрбээр тусгай хэрэгцээт хүүхдүүдэд шим тэжээлтэй хоол бэлтгэж, тэднийхээ төлөө сэтгэл гарган ажиллаж байгаадаа баяртай байгаагаа хэлэв. Мөн өөрийн багш, ахлах тогооч Пэлжээ болон хамт олондоо талархлаа илэрхийлж, мэргэжилдээ үнэнч байхын чухлыг онцоллоо.