Улаанбурхан өвчний халдвар 14 мянга давж, 10-14 насныхан хамгийн их өртөж байна
Халдварт өвчин судлалын үндэсний төвөөс улаанбурхан өвчний нөхцөл байдлын талаарх хамгийн сүүлийн үеийн тоон мэдээллийг олон нийтэд танилцууллаа. Өнөөдрийн байдлаар улсын хэмжээнд нийт батлагдсан тохиолдлын тоо 14,123-т хүрч, харамсалтайгаар 13 хүн нас барсан тохиолдол бүртгэгдээд байна. Анхны зөөвөрлөгдөн орж ирсэн тохиолдол бүртгэгдсэнээс хойш уг дэгдэлт 355 дахь өдрөө үргэлжилж байгааг мэргэжлийн байгууллагаас онцолж, иргэдийг сонор сэрэмжтэй байхыг анхаарууллаа.
Газарзүйн байршлын хувьд халдварын тархалт нийслэл Улаанбаатар хотод хамгийн өндөр буюу 11,517 тохиолдол бүртгэгдсэн бол орон нутагт 2,601 тохиолдол илэрчээ. Одоогоор эмнэлзүйн шинж тэмдэг илэрч, биеийн байдал нь хүндэвтэр байгаа 81 иргэн эмнэлэгт хэвтэн эмчлүүлж байгаа бол хөнгөн хэлбэрээр өвчилсөн 9 хүн өрхийн эмчийн хяналтад гэрээр эмчилгээ хийлгэж байна. Эмнэлгийн байгууллагууд ачаалал ихтэй байгаа ч өвчтөнүүдэд шаардлагатай тусламж үйлчилгээг цаг алдалгүй үзүүлж байгаа аж.
Насны бүлгээр авч үзвэл сургуулийн насны хүүхдүүд, тэр дундаа 10-14 насныхан халдварт хамгийн их өртөж байгаа нь анхаарал татаж байна. Энэ насны бүлэгт нийт 5,198 тохиолдол бүртгэгдсэн нь нийт өвчлөлийн дийлэнх хувийг эзэлж байгаа юм. Иймд эцэг эхчүүд болон асран хамгаалагчид хүүхдүүдийнхээ эрүүл мэндэд онцгой анхаарал хандуулж, халдварын шинж тэмдэг илэрсэн тохиолдолд яаралтай эмнэлгийн байгууллагад хандах шаардлагатай болоод байна.
Дэгдэлтийг хязгаарлах, халдварын тархалтыг зогсоох зорилгоор эрүүл мэндийн салбарынхан нэмэлт дархлаажуулалтын ажлыг эрчимжүүлж эхэллээ. Тухайлбал, 2011 оны нэгдүгээр сарын 1-нээс 2016 оны арванхоёрдугаар сарын 31-ний хооронд төрсөн буюу 10-15 насны хүүхдүүдийг улаанбурхан, улаануудын эсрэг нэмэлт вакцинд хамруулж байна. Иргэд хүүхдүүдээ сургууль дээр нь болон харьяа дүүрэг, сумын эрүүл мэндийн төвд очиж дархлаажуулалтад идэвхтэй хамруулах боломжтой юм.
Улаанбурхан нь агаар дуслын замаар маш хурдан халдварладаг, дэгдэмхий чанар өндөртэй вирусийн гаралтай өвчин тул урьдчилан сэргийлэх хамгийн найдвартай арга нь вакцинжуулалт гэдгийг мэргэжилтнүүд сануулж байна. Цаашид халдварын тархалтыг бууруулахын тулд иргэдийн идэвхтэй оролцоо, дархлаажуулалтын хамрагдалт чухал нөлөө үзүүлэх бөгөөд олон нийтийн газраар зорчихдоо амны хаалт зүүх, хувийн ариун цэврийг сахихыг зөвлөж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.