Э.Агиймаа ирлээ, угтаж авъя

Төрийн соёрхолт дуучин Д.Болдын “В” продакшнаас уран бүтээлийнхээ гарааг эхэлж “Lonely night” дуугаараа олны танил болсон дуучин Э.Агиймаа өвөрмөц хоолой, өндөр бие, өөрийн дүр төрхөөрөө рок, попын залуу дуучдаас ялгардаг. Гэр бүлийн амьдралд хөл тавьж, ээж болсон цагаасаа нэг хэсэг уран бүтээлээс хөндийрч нам гүм амьдрах болсон. Түүний энэ байдал нь хаана юу хийж явааг нь мэдэх гэсэн сониуч сонсогчдыг таавар таацгаахад хүргэсэн гэдэг.  

Өөрийнх нь уран бүтээлийг сонирхож сонсдог фэнүүдийнхээ “Хөдөлмөрч биш залхуу, хэдхэн дуу дуулаад мартагдлаа, сав л хийвэл цэнгээний газраар хэсэх болсон.Э.Агиймаа хааяа нэг дуу дуулаад алга болох юм. Үе тэнгийнхээ дуучид шиг хөдөлмөрлөвөл хол явна” гэж хатуухан шүүмжлэлд алгадуулаад авсан тэрбээр урлагтаа эргэн ирснээ зарлан “Зэрлэг цэцэгсийн хүлэмж» киноны дууг Б.Маралжингоо, У.Уранцэцэг нартай хамтран дуулж олны хүртээл болгож байв. Уран бүтээлдээ шаргуу орж, уран бүтээлчдийнхээ тоглолтод харагдах болсон түүнийг Хөх хотын үзэгчид хэдэнтээ урьж дуулуулсан удаатай.

Түүний дуулсан дуунууд тэнд хит болж эхэлсэн нь  дуучин бүсгүйд ч гэсэн урам өгсөн аж. Э.Агиймаа 2019 онд ямар уран бүтээл хийснээ сонсогчдод харуулахаар нэгдүгээр улиралд худалдаанд гарах шинэ цомгийнхоо эхний track -ыг сонирхуулж байна. Түүний залуусын сонорт хүргэж буй “SILENTIUM" шинэ дуунд  

 “...Би чадсан гээд чанга хэлэх цаг мөч хүртэл

Өөрийн бодол өөртөө зөв 

Хайр мөрөөдлийн өнгө мөнгөнд шунан дурлаж

Хүн гэдгээ мэдэрдэг

Цаг, хүсэл мөрөөдлөө цээжнийхээ мухарт нуу

Зүрх, сэтгэл хэлгүй учраас нэг ч үг дуугарахгүй

Зүгээр л тэвч дотроо догдлон жаргаж бай

Цаг нь ирэхээр буу

Урам зоригоо бусдаар битгий сүйтгүүл...” хэмээх үгтэй аж. Дуучин бүсгүй өөрийн нүүр номдоо  

“Залуус аа, хүсэл мөрөөдлийнхөө төлөө эргэлт буцалтгүй юу ч тохиолдсон огтхон ч сандарч тэвдэлгүй, зогсолтгүй урагшаа тэмцээрэй” хэмээн уриалжээ.

Э.Агиймаагийн уран бүтээлүүд

2008 он «Lonely night» (Ганцаардмал шөнө)

2009 он  “Үлгэрийн хайр”

2009 он  “Хайрлах хүсэл” - ”Миний хөрш чөтгөр” киноны дуу

2010 он “Сэрүүн тэврэлт”- “Аз ойрхон” киноны дуу

2010 он “Надаас чи”

2013 он “Зэрлэг цэцэгсийн хүлэмж” киноны дуу

2014 он “Чамаас би холдмооргүй байна”

2015 он Дуучин Заяа, Агиймаа "Чи миний амьдрал"-"Хуримын дуу" киноны дуу

2016 он  Заяа, Агиймаа "Би чамд хайртай"