Э.Халиунболд "Дакар ралли"-ийн индэр дээр гарч түүхэн амжилт үзүүллээ

Саудын Арабын нутагт зохион байгуулагдсан "Дакар ралли-2026" уралдаан амжилттай өндөрлөж, мотоциклийн төрөлд өрсөлдсөн манай тамирчид түүхэн амжилт үзүүллээ. Гавьяат тамирчин Э.Халиунболд дэлхийн хамгийн хүнд, бартаат замын уралдааны индэр дээр гарч, "Best Rookie" буюу шилдэг залуу тамирчны төрөлд гуравдугаар байр эзэлсэн нь энэ спортын түүхэнд шинэ хуудас нээсэн онцлох үйл явдал болов.

Энэ жилийн уралдаанд дэлхийн өнцөг булан бүрээс ирсэн 120 гаруй шилдэг тамирчин хурд хүчээ сорьсноос Э.Халиунболд нийлбэр дүнгээр 16 дугаар байрт шалгарчээ. Тэрээр "Ралли-2" ангилалдаа зургаадугаар байрт хурдалсан бөгөөд шилдэг залуу тамирчны шагнал хүртсэн нь олон улсын тавцанд ур чадвараа батлан харуулсан хэрэг байлаа. Тамирчин маань уралдаанаа амжилттай дуусгаад нэгдүгээр сарын 20-ны өглөө эх орондоо газардсан байна.

Түүнтэй хамт мөр зэрэгцэн уралдсан Олон улсын хэмжээний мастер П.Мөрөн ч чамлахааргүй амжилт үзүүлж, ерөнхий дүнгээр 29 дүгээр байрт орсон байна. Өмнөх жилийн уралдаанд 76 дугаар байрт орж байсан тэрээр энэ удаад амжилтаа бүхэл бүтэн 47 байраар ахиулж чадсан нь түүний бэлтгэл сургуулилт, туршлага хэрхэн зузаарсныг илтгэнэ. П.Мөрөн "Ралли-2" ангилалдаа 19 дүгээр байрт бичигдэн, уралдааныг амжилттай дуусгажээ.

Энэ удаагийн "Дакар ралли" нь нэгдүгээр сарын 3-наас 17-ны хооронд үргэлжилж, тамирчид нийт 13 гарааны турш 8,000 гаруй километр замыг туулсан байна. Үүний 5,000 орчим километр нь тусгай хурдны шалгалт байсан бөгөөд зохион байгуулагчид замын 75 хувийг цоо шинээр төлөвлөсөн нь уралдааныг улам сонирхолтой, өрсөлдөөнтэй болгожээ. Саудын Арабын Янбу хотоос эхэлж, Рияд, Биша хотуудыг дамжин барианд орсон уг уралдаанд тамирчид "Тал нутгаас Дакарт" төслийн хүрээнд оролцсон юм.

Авто, мото спортын "Олимп" гэгддэг энэхүү нэр хүндтэй тэмцээнд үзүүлсэн амжилт нь тамирчдын хувийн карьерын оргил төдийгүй, энэ төрлөөр хичээллэж буй залуу үеийнхэнд томоохон урам зориг өгсөн үйл явдал боллоо. Дэлхийн шилдгүүдтэй эн тэнцүү өрсөлдөж, шагналын тавцанд зогсох боломжтойг харуулсан нь цаашдын олон улсын тэмцээнүүдэд гаргах амжилтын эхлэл гэж мэргэжилтнүүд дүгнэж байна.