АНУ 75 орны иргэдэд цагаачлалын виз олгохыг тодорхойгүй хугацаагаар зогсоолоо
АНУ-ын засгийн газар цагаачлалын бодлогодоо эрс өөрчлөлт оруулж, дэлхийн 75 орны иргэдэд цагаачлалын виз олгох үйл явцыг тодорхойгүй хугацаагаар зогсоох шийдвэр гаргалаа.
2026 оны 1-р сарын 15-нд зарласан энэхүү шийдвэр нь хууль ёсны цагаачлалын урсгалыг хязгаарлах, ялангуяа "нийгмийн халамжийн дарамт" үүсгэхээс сэргийлэх зорилготой өргөн хүрээний арга хэмжээний нэг хэсэг юм. Тус хязгаарлалт нь 2025 оны нэгдүгээр сарын 21-нээс эхлэн албан ёсоор хэрэгжиж эхлэх бөгөөд АНУ-ын Төрийн департаментаас дэлхий даяарх консулын газруудад "байнгын оршин суух визний шийдвэр гаргалтыг царцаах" заавар хүргүүлжээ.
Энэхүү хоригт Монгол Улс орсон бөгөөд Латин Америк (Бразил, Колумб), Өмнөд болон Төв Ази (Пакистан, Бангладеш, Казахстан), Ойрхи Дорнод, Африк (Египет, Нигери), Зүүн Европ (Орос, Гүрж) зэрэг бүс нутгийн улсууд багтсан нь дэлхийн хүн амын гуравны нэгийг хамарч байна.
Засаг захиргааны зүгээс шинээр ирж буй цагаачид засгийн газрын халамжид найдахгүй байх, Америкийн татвар төлөгчдөд дарамт учруулахгүй байх баталгааг хангахын тулд шалгуур үзүүлэлтүүдийг дахин үнэлэх шаардлагатай гэж тайлбарлажээ. Иймд жагсаалтад багтсан орнуудын иргэдийн байнгын оршин суух эрх буюу "Ногоон карт"-ын хүсэлтийг хянан шийдвэрлэх ажиллагааг түр зогсоогоод байна.
Шинэ журмын дагуу гэр бүлийн гишүүдээ урих, ажил эрхлэлтэд суурилсан ногоон карт (EB-1, EB-2, EB-3) болон Сугалааны виз (Diversity Visa) зэрэг цагаачлалын бүх ангилал хоригт хамрагдана. Харин аялал жуулчлал, бизнес (B-1/B-2), оюутан (F-1) болон түр хугацааны ажлын визүүд (H-1B, L-1) энэ удаагийн хоригт өртөхгүй ч шалгалтын үйл явц илүү нарийн, чанга болох төлөвтэй байна. Хэдийгээр нэр дурдсан орнуудын иргэд товлосон ярилцлагадаа орох боломжтой ч хяналтын хугацаа дуустал виз олгохгүй байхаар зохицуулжээ.
АНУ-ын Иргэншил, Цагаачлалын Алба (USCIS) мөн дотоод үйл ажиллагаандаа хязгаарлалт тогтоож, өмнөх онуудад "эрсдэлтэй" гэж тодорхойлсон орнуудын иргэдийн статус сунгах болон бусад хүсэлтийг шийдвэрлэхийг түр зогсоосон байна. Түүнчлэн 2021 оны нэгдүгээр сараас хойш батлагдсан зарим өргөдлийг дахин шалгаж эхэлсэн нь өмнө нь олгогдсон зөвшөөрлийг цуцлах эсвэл дахин ярилцлагад дуудах нөхцөлийг бүрдүүлж болзошгүй юм. Энэ нь зөвхөн шинээр виз хүсэгчид төдийгүй, одоо АНУ-д оршин сууж буй цагаачдад ч нөлөөлөх эрсдэлтэй алхам болж байна.
Энэхүү шийдвэр нь АНУ-ын цагаачлалын системд сүүлийн жилүүдэд хийгдэж буй хамгийн томоохон хязгаарлалтуудын нэг бөгөөд цаашид виз мэдүүлэгчид "Нийгмийн халамжийн дарамт" болохгүй гэдгээ нотлох хатуу шалгуурыг давах шаардлагатай болж байна. Одоогоор виз олголтыг сэргээх тодорхой хугацааг зарлаагүй байгаа тул олон мянган гэр бүл, мэргэжилтнүүдийн ирээдүй тодорхойгүй байдалд орлоо. Шинжээчид энэ алхмыг үндэсний аюулгүй байдал болон эдийн засгийн хамгаалалтын нэрийн дор хууль ёсны цагаачлалыг бууруулах бодлогын үргэлжлэл гэж дүгнэж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.